Dewleta Tirik a dagirker di 9’ê Cotmehê de li ser penaberên Efrînî ku li Şehbayê dijîn, êrîşek hewayî pêk anîn. Di encama êrîşa hewayî de 3 endamên TEVDEM ê Zelal Efrîn, Mazûlm Antep û Alaf Mûrad şehîd bûn. Zelal Efrîn yek ji jinên pêşeng bû ku piştî fermana 3’yê Tebaxa 2014’an berê xwe da Şengalê û di rêxistinkirina civaka Êzidî de cihê xwe girt.
Tevgera Azadiya Jinên Êzidî (TAJÊ) bi beşdariya endam û rêveberên sazî û rêxistinên civaka Êzidî ji bo şehîd Zelal Efrîn li goristana Şehîd Dilgeş û Şehîd Berxwedan merasîma bîranînê li dar xist. Merasîma bîranînê bi deqeyek rêzgirtina ji bo ruhê şehîdan destpê kir. Piştre ji aliyê dayikên Êzidî ve ji bo şehîda find hatin pêxistin û axaftina hatin kirin.
ŞEHÎD ZELAL JI BO CIVAKA ÊZIDÎ KEDEKE MEZIN DA
Li ser navê Saziya Malbatnê Şehîdan Pakîza Celal axivî û diyar kir ku şehîd Zelal mîna bi sedan jinên şoreşger berê xwe da Şengalê û di rêxstinkirina civaka Êzidî kedeke mezin da û got, “Di dema ku li Şengalê kar û xebat da meşandin, mîna hemû malbatên Şengalê malbata wê bin, xwe ji hemû pirsgirêkên gel berpirsiyar dît û barekî giran da ser milê xwe. Ji ber keda wê ya bêhempa em wê wek şehîda xwe dibînin. Her kesekî li ber civaka me de ked da be û şehîd bikeve li kuderê be ew şehîdên me ne.”
‘EM SAYA ŞEHÎDAN LI SER AXA XWE DIJÎN’
Li ser navê TAJÊ’ê jî Şemê Remo axivî û got: “Tenê bi gotinê em nikarin ji heqê şehîd derkevin, şopandina rêya şehîdan wê bibe erka me ya sereke û di karê xwe yê pratîkî de em ê xeyalên wan pêk bînin. Şehîd Zelal bi salan li Şengalê kar û xebatên cuda meşand. Di dema êrîşa li ser Efrînê de dest ji Şengalê berneda û rêxistinkirina civaka me kire erka xwe ya sereke. Bi saya serê şehîdan, teqez wê serkeftin misoger bibe. Her kesên ji bo azadiya gelê xwe berxwedaniyê bike, di hedefa dijminê dagirker de ne, hevalên me ku canê xwe feda kirine di encama berxwedaniya ji bo civaka xwe gihane asta şehadetê, em berxwedaniya hemû şehîd silav dikin. Heke em îro li ser axa xwe dijîn ew ji bi keda şehîdan e.”
‘HEVAL ZELAL ŞEHÎDA ÊZDÎXANÊ YE’
Hevseroka Meclisa Gel a Şengalê Emşê Korkorkî li ser navê Rêveberiya Xweser a Şengalê axivî. Emşê li ser navê gelê Şengalê sersaxî ji malbatên şehîdan xwest û wiha axivî: “Serkeftina herî mezin ew e dema em karibin li ser axa xwe li bîranîna şehîdên xwe xwedî derkevin. Dema em karibin li ser axa xwe bijîn ev bi keda şehîdan e. Raste heval Zelal ne li Şengalê şehîd ket lê ew şehîda Êzdîxanê ye. Ji ber ku bi saya keda wan şehîdan em dikarin li ser axa xwe bijîn û li hev kom bibin. Ji bo ku Şengal xweser bibe em soz didin şehîd Zelal em ê li ser xeta wê bimeşin û dest ji vê tekoşînê bernedin.”
Piştî axaftinan sînevîzyona li ser jiyan û tekoşîna şehîd Zelal hatibû amadekirin hat pêşandan. Bîranîn bi berzkirina dirûşmeya “Şehîd namirin’ bi dawî bû.
