Navnîşana destpêkê ya îsal a konserên “Dema Azadiyê” ku parçeyekî kampanyayê ne, bajarê Bolognayê ye ku hembajariya rûmetî dane Rêber Apo. Konser bi piştevaniya gelek saziyên Îtalî hate lidarxistin û gelek kes tevlî bûn.
Di axaftinên beriya konserê hatin kirin de, îşaret bi girîngiya kampanyayê û rola Rêber Apo ya ji bo çareseriya pirsgirêka Kurd hate kirin.
Alîkara Serokatiya Şaredariya Bologna Emily Marion Clancy diyar kir ku kampanya hêviyên aştiyê xurt dike û got, “Pirsgirêka Kurd ne pirsgirêkek mirovî, di heman demê de pirsgirêkek nasnameyê ye. Pirsgirêkeke ku azadiya mirovan lê tê tunekirin, lê tê hepskirin. Fikrên Ocalan ji bo me girîng in. Lewma serketina vê kampanyayê girîng e.”
Rayedarê Buroya Enformasyonê ya Kurdistanê ya Îtalyayê Yilmaz Orkun jî wiha got: “Ji bo azadiya Rêber Apo sê sal in dostên me bi kedên cidî têdikoşin. Bi vê kampanyaya navneteweyî tecrîda li ser Rêbertiya me hate şikandin. Êdî azadiya wî pir nêz e.”
Di dema konsere de ciwanên Îtalyan ji pirtûkên Rêber Apo hin beş xwendin, xwendekarên zanîngehê têkildarî fikrên Rêber Apo yên derbarê azadiya jinê û jiyana hevpar a gelan de axivîn. Beşdaran banga ji bo bidawîkirina têkoşîna çekdarî ya PKK’ê jî, weke gaveke girîng a ji bo aştiyê nirxandin.
