Hêzên YPG, YPJ û Asayîşê ên di eniya şer a Hesekê de diyarkirin ku ew ê têkoşîna xwe ya li dijî êrîşên dijmin bi biryardarî bimeşînin. Her wiha bang li gelên li Bakur, Başûr û Rojhilat kirin ku bi ruhê serhildanê rabin.
RÊDÛR DIRBESIYÊ: EM BERXWEDANA XWE YA LI XETA SÎNOR DIMEŞÎNIN
Şervanê YPG/ Asayîşê Rêdûr Dirbesiyê wiha got, “Li bajarê Hesekê dijmin êrîşî xaka me dike. Me jî bersiv da û em ê bersiv bidin. Em wekî şervanên YPG, YPJ û Asayîşê li ser xeta sînor in. Bila gelê me netirse.”
Redûr, destnîşan kir ku çapemeniya dijmin hewl dide raya giştî bixapîne û wiha got, “Dijmin dibêje, ‘Em hatin Hesekê, me girt’ û tevlîhevî derdixin. Hêviya me ji gelê me ew e ku bawerî bi propagandayan neynin. Armanca wan ew e ku gel bitirsînin û bidin revandin.”
Redûr bertek nîşanî qutkirina keziya şehîda YPJ’ê da û wiha got, “Em tola wê hilînin û digrin. Bila nebêjin ku wê bi qutkirina keziyê biqedînin. Wê bi deh hezaran hevrêyên jin tola wê hilînin û porê xwe bikin kezî.”
Rêdûr bang li gelê Bakur, Başûr û Rojhilat kir û wiha got, “Bila bi heestên Kurdîtiyê rabin. Îro şerê hebûn û nebûnê ye. Em hemû hevalên di eniya şer de silav dikin û serkeftinê dixwazin.”
SEMA CÛDÎ: EM Ê TU CAR QEBÛL NEKIN
Şervana bi navê Sema Cûdî jî wiha got, “Em di eniya herî pêş de ne. Dijmin êrîşê me kir, em jî bersiv didin. Em li ber xwe didin û em ê tu caran teslîmiyetê qebûl nekin.”
Sema Cûdî bal kişand ser êrîşa ku li ser şervana jin a şehîd bûye hat kirin û wiha got, “Em ê tola hemû şehîdên xwe hilînin.”
XEBAT DÊRIK: EM LI PEY ŞOPA HEVAL ZIYAD Û HEVAL LEYLA NE
Xebat Dêrik diyar kir ku çeteyên dewleta Tirk a dagirker û çeteyên HTŞ’ê yên Colanî bi awayekî hovane êrîşî gel dikin û wiha got, “Em ê li pey şopa Heval Ziyad û Heval Leyla de berxwedana xwe bidomînin.”
Xebat wiha berdewam kir, “Keziyê hevrêyên me yên şehîd qut kirin. Bila bizanibin ku me ê tola xwe hilînin. Divê tevahiya gelê Kurd bi ruhê serhildanê rabe.”
Xebat, hemû hevrêyên xwe yên ku li eniyên şer li ber xwe didin û çiyayan silav kir û destnîşan kir ku wê têkoşîn bi biryardarî bimeşe.
ZINAR DIRBESIYÊ: MORALA ME DI CIH DE YE, BERXWEDANA ME DEWAM DIKE
Şervanê ji Dirbesiyê Zinar jî wiha got, “Em di eniya şer a Hesekê de ne. Morala hevalan di cih de ye.”
Zinar, bang li gelê Bakur, Başûr û Rojhilat kir ku bi ruhê serhildanê rabin û wiha got, “Keziya hevrêya me ya şehîd qut kirine. Bila gelê me bizanibe ku me tola wê rakir û em ê rakin jî.”
Zinar bilêv kir ku berxwedan li hemû eniyan bi biryardarî dewam dike.
