Tevgera Azadiya Jinên Êzidî (TAJÊ) bi beşdariya gelek kesan li Dewreya Mam Zekî ya Nahiya Sinûnê daxuyanî da. Daxuyanî ji aliyê Berdevka TAJÊ Rîham Hico ve hat xwendin.
Rîham Hico diyar kir ku ev 11 salin civaka Êzidî li Başûrê Kurdistanê di bin konan de dijîn. Rîham Hico destnîşan kir ku li ser Şengal û civaka Êzidî hîn jî lîstok û planên qirêj dewam dikin û got, “Ev plan û lîstok berdewamiya fermanê ne. Biryara Wezareta Koç û Koçberan, zêdekirina artêş, sîlehên giran û di nava sivîlan de bicîhkirina wan, zextên Hikûmeta Iraqê yên li ser Şengalê hemû jî bi hedefa pêkanîna peymana 9’ê Cotmehê ango fermana di bin navê qanûnê de ye. Mesrûr Barzanî gef li Şengalê xwar û ji Hikumeta Iraqê xwest ku ji bo pêkanîne plana 9 cotmehê zextên xwe li ser Şengalê zêde bike. Armanca liv û tevgera artêşa Iraqê li Şengalê pêkanîne vê plana qirêj e.”
MADEYA 140 NEHATIYE ÇARESERKIRIN
Rîham Hico wiha berdewam kir: “Li şûna hikûmeta Iraqê, berpirsyariyên xwe yê mirovî û wijdanî li hember Şengalê pêk bîne, malên milet ên hilweşiyayî ji nû ve ava bike, projên kar çêbike û derfeta vegerê ji bo koçberan ava bike, biryara guhartina demografiya Şengalê dide. Wezareta Koç û Koçberan di 20’ê Tebaxê de biryar derxist ku heya serê salê ger koçber venegerin ser cihê xwe, wê ji statûya koçberan derkevin û bibin niştecihên cihê lê koçber bûne û dosya koçberan wê were girtin. Herî dawî wazaretê got ku wê hemû kampan bikin yek. Em dixwazin bi bîr bixin; Madeya 140 a bi nakok ku Şengal jî dikeve nav di navbera hikûmeta Iraqê û hikûmeta Herêma Kurdistanê de, di sala 2007’an de xwestin bi referandûmê pêk bînin lê nekarîn pêk bînin û heya roja îro ev made nehatiye çareserkirin.
‘EM BIRYARA WEZARETÊ XETEREYEK MEZIN DIBÎNIN’
Her wiha hevpeymana 9’ê Cotmetê ku di navbera hikûmeta Iraq û Herêma Kurdistanê de hatî îmzekirin jî nekarîn pêk bînin. Ev biryara siyasî ya Wezareta Koç û Koçberan ji madeya 140 û hevpeymana 9’ê Cotmehê ne qut e. Em vê biryarê gelek metirsîdar dibînin. Ev biryarek li gor berjewediyên siyasî ye, nakeve berjewendiyên civaka me. Em qebûl nakin gelê me bibe qurbanê van siyasetên heyî. Lewre em biryara Wezareta Koç û Koçberan, xeteriyek mezin dibînin û qebûl nakin.
Êzidiyan ji koka wê qut kirin tê wateya berdewamiya fermanê. Ji milekî ve hikûmeta Iraqê biryara efûya giştî derxist ku di encamê vê efûya gîştî de bi hezaran DAÎŞ’î ku destê wan di xwîna Êzidîyan de heye ji zindanên Iraqê hatin berdan. Milekî jî biryara girtina kampan derxist. Ev rewşek gelek metîrsîdar e, li şûna ku hikûmeta Iraqê çeteyên DAÎŞ’ê dadgeh bike serbest ber dide. Miletê me yê koçber ê li kampan ji pêşerojek tarî re dihêle. Em balê dikşînin ser rastiyek girîng, ger Êzidî venegerin ser axa xwe yê li wir rastî êrîşekê werin wê çawa xwe biparêzên yan kî wan biparêze. Ji bo me civaka Êzidî, rastî û tecrûbeya fermana 2014 an tu carî wê neyê jibîrkirin.”
‘BILA GELÊ ME VEGERE SER AX Û WARÊ XWE’
Berdevka TAJÊ Rîham Hico herî dawî ev bang kir: “Em tevgera azadiya jinên Êzidî bang li hikûmeta Iraqê dikin ku helwesta xwe li hemberî Şengalê û civaka Êzidî biguhere, neyê lîstokên PDK û dijminatî bi civaka me re neke. Her wiha em bang li miletê xwe yê koçber dikin bila vegerin ser ax û warê xwe bi vê awayê jî bersiv bidin van lîstokan.
Di dawî de em bang li raya gîştî dikin, bi taybet ji bo welatên ku ferman wek jenosîd nas kirine bi erk û berpirsyartiyên xwe yên wijdanî û mirovî rabin. Herî Em bang li civaka Êzidî dikin ku xwedî li Şengalê derkevin û li kuderê bin bila bibin, bê helwest nemînin.”
Daxuyanî bi beezkirina dirûşmên “Bijî berxwedana Şengalê” û “Jin Jiyan Azadî” bi dawî bû.
