Piştî banga Rêberê Gelê Kurd Abdullah Ocalan ji bo “Aştî û Civaka Demokratîk”, PKK’ê Kongreya xwe ya 12’emîn lidar xist û ragihand ku hebûna xwe ya rêxistinî û têkoşîna xwe ya çekdarî bi dawî kiriye û ew ê têkoşîna xwe bi perspektîfek nû bidomîne. Piştre çekên xwe bi merasîmek sembolîk îmhakirin.
Piştî heşt mehan Tevgera Azadiya Kurd, ragihand ku gerîlayên li Tirkiyeyê wekî nîşanek niyeta baş dest bi vekişîna ber bi Herêmên Parastinê yên Medyayê kirine.
Hevberdevkê Komîsyona Hiqûq û Mafên Mirovan a DEM Partiyê Ozturk Turkdogan ji ANF’ê re axivî û vê pêngavê wekî “bibîrxistina berpirsyariya desthilatdariyê” bi nav kir.
Turkdogan, destnîşan kir ku ji bo pêşveçûna pêvajoya çekberdanê pêdivî bi avakirina bingehek qanûnî heye got, “Divê komîsyona ku li meclîsê hatiye avakirin di zûtirîn dem de li Îmraliyê bi Birêz Abdullah Ocalan re hevdîtin bike da ku çarçoveya qanûnên entegrasyona demokratîk destnîşan bikin.”
Turkdogan got, “Di xwezaya tiştan de ye ku divê niha gavên qanûnî werin avêtin. Ev pêvajo berdewamiya lêgerîna aştiyê ya ku ji aliyê Rêberê Gelê Kurd Abdullah Ocalan ve di sala 1993’yan de dest pê kiriye ye û tevgera Kurd bi biryardarî li ser vê xetê pêşve diçe.”
Turkdogan, behsa girîngiya nêzîkatiyek erênî ji bo pêşvebirina pêvajoya aştiyê û civaka demokratîk kir û diyar kir ku desthilatdarî jî dê neçar bimîne ku gavan bavêje.
Turkdogan, diyar kir ku Tirkiye hîn negihîştiye aştiyê û got, “Modela bidestxistina aştiyê bi rêya demokrasiyê, li Tirkiyeyê bicîh nebûye; niha em pêvajoyek demokratîkbûnê bi aştiyê ava dikin.”
Turkdogan, dubare kir ku divê Komîsyona Meclîsê serdana Îmraliyê bike da ku pêvajo mayînde bibe û got, “Ev gav gavek stratejîk e, ne gavek taktîkî ye. Ji bo Komîsyonê dê pir sûdmend be ku guh bide Birêz Abdullah Ocalan.”
