Vegera ber bi Şengalê ve didome. Doh ji Kampa Çem Mişko ya girêdayî parêzgeha Dihokê ya Başûrê Kurdistanê 42 malbat ku ji 163 kesan pêk tê piştî 11 salan vegeriyan Şengalê. Malbatên ku vegeriyan li Komelgeha Digurê, gundê Sêkêniye û Rembûsî bi cih bûn. Tê payîn ku di nava van rojên pêşde jî gelek malbat vegerin Şengalê.
Ev demeka dirêj bû desthilata Başûrê Kurdistanê rê nedida koçberên Şengalî vegerin ser cih û warên xwe. Rêveberiya Xweser a Şengalê ji bo vegera Şengaliyên li kampan gelek car bang kir.
Tê texmînkirin ku zêdeyî 140 hezar welatiyên Şengalî li Başûrê Kurdistanê di bin konan tên ragirtin.
Hêjayî bi bîrxistinê ye ku beriya 5 rojan li Kampa Xankê ku ew jî bi ser parêzgeha Dihokê ve ye konekî ya malbatên Êzidî şewitîbû û di encama wê şewatê de jinek tevî 4 zarokên xwe şewitîn. Jina Êzidî ya bi navê Înas Dexîl Hemo piştî 2 rojan li Nexweşxaneya hawar hatinê a Dihokê jiyan xwe ji dest û 4 zarokên wê hîna tên derman kirin. Li gorî agahiyan rewşa 2 zarokan jî giran e.
