Komîteya Gel û Baweriyan a KCK’ê bi wesîleya Cejna Qurbanê daxuyaniyeke nivîskî weşand. KCK’ê Cejna Qurbanê ya alema Îslamê pîroz kir û got: “Em hêvîdar in ku ev cejn ji bo gelên Misilman bibe sedema aştî, azadî, aramî, yekitî, xwişk û biratiyê.”
Daxuyaniya KCK’ê bi vî rengî ye: “Cejn di nava civakên Misilman de weke rojên aştî, piştevanî û parvekirinê tê pêşwazîkirin. Di heman demê de cejn li dijî mêtînger, desteserkerên vînê, li dijî kesên maf û hiqûqê nas nakin çanda têkoşînê temsîl dike. Em hêvîdar in ku Cejna Qurbanê ya 2024’an van hest û ramanan di nava gelê me de mezintir bike.
Weke cejnên berê di vê cejnê de gelên Misilman û gelê Kurd di bin êrîşên mezin de ne. Mezinkirina piştevaniyê ya gelê Kurd û derdorên Misilman ên rast ya li dijî êrîşên deweta Tirk a qirker û têkoşîna wan a li dijî zîhniyeta qirker wê li gelan bide qezençkirin. Li dijî dewleta Tirk ku Kurdan înkar dike, hebûna wan qedexe dike, vîna wan nas nake, Kurdan weke civakeke qels dibîne, çalakiyên bi her curê mafeke mafdar û rewa ye. Ya ku Îslama Muhammed li Misilmanên Kurd ferz dike ew e ku li dijî desteserkirina vînê ya zaliman, bêhiqûqiyan, tecrîd û êşkenceyan têkoşînê mezin bikin. Jixwe di roja me de îbadeta beyî têkoşîna li dijî tecrîd, êşkence, talan û desteserkirinê ne pîroz in.
Mafê herî xwezayî yê civakan e ku li ser nasname, ziman, çand û axa xwe bijîn û xwe birêve bibin. Lê dewleta Tirk mafên xwezayî yên mirovî yên gelê Kurd ji destê wan digire. Desteserkirina mafên Kurd, nenaskirina vîna wan jî înkara Îslamê ye.
Kurd ku Rêberê wan di şert û mercên giran ên tecrîd û êşkenceyê de ye, vîna wan tê desteserkirin, mafên wan tê înkarkirin, di bin zilma zaliman de hewl tê dayîn bên qirkirin, divê têkoşîna xwe ya bidestxistina mafên xwe, xwedî lê derketina vîna xwe weke îbadetê pêk bînin. Em dixwazin careke din bi bîr bixin ku erka Misilmanan e ku vê cejnê bikin wesîleya têkoşîneke wiha. Di vê wateyê de Misilmanên ku xeta Muhammed de bawerî pê tînin, divê bizanibin ku heta li dijî mêtînkariya Tirk nerabin, tu îbadet wê negihe wateya xwe ya pîroz. Divê Misilmanên Tirk bizanibin ku têkoşîna li dijî polîtîkayên qeyûm, desteserkirina vînê û zîhniyeta mêtînkar a AKP-MHP’ê bi qasî îbadetê xêr e. Bi vê wesîleyê em bang li hemû Misilmanên dilsozê nirxên demokratîk ên Îslamê dikin ku di refên têkoşîna hevpar de cih bigirin.
Misilmanên Kurdistanî ên hêja, em dixwazin bi bîr bixin ku weke her cejnê ev cejn jî pêşî girîngî bidin serdana goristana şehîdan, malbatên şehîdan, malbatên girtiyan, nexweş, extiyar, hewcedaran. Gelê me yê alîkarî dikin û qurbanan didin ji bo alîkariyên wan bigire Kurdistaniiyên hewcedar alîkariyên xwe bi rêya Saziyên Welatparêz ên Demokratîk bikin.
Em tevgera azadiya Kurdistanê careke din bi van hest û ramanan cejna Misilmanên Kurdistanî û gelên Misilman pîroz dikin. Em bang li her kesî dikin ku li dijî dewleta Tirk a mêtînger û qirker li eniyeke hevpar, rêxistintir û xurttir têbikoşin.”
