Di 9’ê Çileya 2013’an de Sakîne Cansiz bi nûnera KNK’ê Fîdan Dogan (Rojbîn) û endama Tevgera Ciwanan Leyla Şaylemez (Ronahî) re di encama sûîqesteke nemerdane de li paytexta Fransa Parîsê hatin qetilkirin. Bi boneya 12’emîn salvegera qetilkirina 3 têkoşerên azadiyê, bi pêşengtiya Kongra Star li bajarê Hesekê ya Kantona Cizîrê meşek girseyî hat lidarxistin.
Di meşê de hemû nûner, sazî û dezgehên jinan û pêkhateyên ji Til Temir, Dirbêsiyê, Hesekê, Hol, Şedadê û Til Birakê amade bûn. Di meşê de wêneyên her sê têkoşeran û pankartên bi nivîsa “Ji komplogeran re na” hatin hilgirtin. Meş ji xaçerêya Kevokê dest pê kir û li xaçerêya Şehîd Serhed a li taxa Miftî veguherî mitîngê.
Piştî deqeyek rêzgirtinê, endama Koordînasyona Kongra Star Şêraz Hemo axivî. Şêraz destnîşan kir ku pêvajo pêvajoya diyarkirina çaranûsa jinan e û wiha got: “Îro em di salvegera komkujiya Parîsê de qetilkirina têkoşeran şermezar dikin. Hewldanên siyaseta desthilatdariyê bi hedefgirtina pêşengên jin heye, ev tê wateya berdewamiya siyaseta tunekirina nasnameya jin. Pêşengtiya jin û hêza wê wekî bendavek li beramberî siyasetên wan e. Yê ku komkujiya Parîse pêk anî, dewleta Tirk e. Îro jî endama Kombûna Jinan a Zenûbiya kir hedef. “
Şêraz Hemo di berdewamiya axaftina xwe de anî ziman ku gel fêrî azadiyê bûye û wiha got: “Jinan tama azadiyê girtine, lewma jin êdî siyasetên çewisandinê qebûl nakin. Jinan di bin projeya neteweya demokratîk de xwe birêxistin kirin û helwesta xwe nîşan dan. Hêz û îradeya jinan ji mirinê mezintir e, lewma me xeta berxwedanê bijartiye û em ê li ser vê xetê dewam bikin. Em bi dilgermî berxwedana Bendava Berxwedanê silav dikin û piştgirî didin wan. Em di pêvajoyekek hesas de ne ku wê tê de çaranûsa jinên azad were diyarkirin. Em ê çaranûsa xwe bi ked, têkoşîn û îradeya jina azad ava bikin. Eger îro cîhan behsa Sûriyeya nû dike, divê jina azad xwedî rol be. Sûriyeya nû û demokratîk, bêyî hebûna jinê nayê avakirin û nayê qebûlkirin.”
Di berdewama mitîngê de li ser navê Meclisa Jinan Partiya Yekitiya Demokratîk (PYD) Îlham Mustefa jî axivî. Îlham Mustefa wiha got: “Têkoşer Sakîne û rêhevalên wê mîrasek ji bo hemû jinan in. Yê ku ronahî da rêka me, ked û fikrê wan ên azad e. Lewma em şopdarên xeta wan in.”
Miting bi dirûşma “Şehîd namirin” bi dawî bû.
