Xelkê kantona Firatê endamê Hêzên Antî Terorê (HAT) ên Ewlekariya Hundirîn Şerger (Şiyar Bozan) ku di 2’yê Sibatê de li Pira Qereqozaxê şehîd bû bi merasîmeke girseyî li Şehîdgeha Şehîd Dîcle ya Kobanê spart axê.
Piştî deqeyeke rêzgirtinê Hevseroka Desteya Jîngehê ya Kantona Firatê Elmas Romî axivî û got, “Êdî em di pêvajoya hebûnê de ne. Dewleta Tirk dixwazin projeya me ya neteweya demokratîk tune bike, lê em ê li hemberî her curê qirkirin bisekinin.” Elmas Romî bi dewamî got, “Armanca dagirkeriyê ji van êrîşan qirkirin e. Şervanên me jî li Pira Qereqozaxê û Bendava Tişrînê dan ispatkirin ku wê ti kes nikaribin îradeya şervanan tune bike. Em li vir in û em hene.”
Dûre jî Hevserokê Desteya Hundirîn Merwan Hemo jî diyar kir ku wê li hemberî dagirkeriyê rabin, teqez bi ser bikevin û got, “Li gel her cure êrîşan, şervanên me berxwedaniyeke efsanewî, rojane fedekariyê dikin. Em ê jî bikaribin nirxê vî gelî biparêzin û em ê tu carî nehêlin ku dagirkeriya Tirkiyê bigihêje armaca xwe. Ev axa me ye û em ê li ser vê axê jî li ber xwe bidin.”
Piştre birayê şehîd Şerger, Rêzan Bozan strana ku birayê wî jê hez dikir ya bi navê “Dil dixwaze here Cengê” strand û bi wê yekê birayê xwe oxir kir.
Di dawiya merasîmê de wesîqeya şehîd hat xwendin û radestî malbatê hat kirin.
Şehîd bi dirûşmeya “Şehîd Namire” hate veşartin.
