Li avahiya Odeya Endezyarên Avahîsaziyê (ÎMO) ya Amedê daxuyanî hate dayîn. Berdevkê Demê yê TMMOB’ê Diyar Kût di daxuyaniyê de axivî û bal kişand ser pevçûnên domdar û krîzên li Rojhilata Navîn.
Kût diyar kir ku nêzîkatiyên yekdestî, otorîter û dijdemokratîk pirsgirêkên li herêmê kûrtir dikin, ev polîtîka ji şer û mirinê pêvtir ti tiştekî din bi xwe re nayne.
ŞENSÊ PROJEYÊN YEK NETEWE LI SER PIYAN BIMÎNE TINEYE
Kût li ser geşedanên Rojhilata Navîn û Sûriye rawestiya û destnîşan kir ku şensê projeyên “yek netewe” li ser piyan bimîne tineye.
Kût anî ziman ku rêya çareseriya li Sûriyeyê di rêveberiya gelan de derbas dibe û diyar kir ku polîtîkayên Tirkiyeyê li şûna çareserî û aştiyê bi xwe re bîne, pirsgirêka Kurd xist rojeva qada navneteweyî.
HEWLÊN ÇARESERIYA DEMOKRATÎK
Kût anî ziman ku ew hewlên çareseriya aştiyane û demokratîk hêja dibînin û got:
“Ji aliyekî ve qeyûm tên tayînkirin, li dijî Kurdên li Rojava operasyonên leşkerî tên kirin, li aliyê din jî qala aştiyê dikin. Ev yek civakê dixe nava fikaran. Weke Platforma Kordînasyona Bajar a TMMOB’ê daxwaz dikin ku Tirkiye li Sûriyeyê piştgiriyê bide Kurdan, dawî li tayînkirina qeyûman bîne. Em piştgiriyê didin gavên ji bo çareseriyê û diyalogê yên bên avêtin.”
