Tevî serma û baranê çalakiya nobetê ya li Bendava Tişrînê di roja 38’an de dewam dike. Çalakger bi birydar in ku heya rawestandina êrîşên dewleta Tirk a dagirker û çeteyên wê nobetê bidomînin.
Vê sibehê bi sedan şêniyên Dêrik, Girkê Legê û Çilaxa ji bo nobetê dewr bigirin, ber bi bendavê ve bi rê ketin.
Şêniyên ber bi bendavê ve bi rê ketin, dê nobetê ji koma ji Hesekê, Dirbêsiyê, Til Temir, Şedadê û Til Birakê dewr bigirin.
Dewleta Tirk a dagirker û çeteyên wê ji 8’ê Kanûna 2024’an ve êrîşên dijwar li dijî Bendava Tişrînê pêk tînin.
Gelê Herêma Bakur û Rojhilatê Sûriyeyê 38 roj e bi armanca parastina bendavê û nîşandana dijbertiya xwe ya li hemberî êrîşan, kom bi kom nobeta parastina bendavê digire.
Ji Girkê Legê Evîn Mihemed ku ew jî beşdarî berxwedanê bûye, ev tişt got: “Bendav tenê çavkaniya av û enerjiyê nîne, di heman demê de siberoja gelê me ye. Parastina vir, tê wateya parastina jiyan û azadiya me.”
Li derdora Bendava Tişrînê tedbîrên ewlehiyê tên zêdekirin, israra gel a ji bo aştî û mafê jiyanê bal dikişîne. Berxwedana nobetê nîşan dide ku heta êrîş bi dawî dibin, wê berxwedan bidome.
