Cenazeyê şervanên Hêzên Cebhet El Ekrad ên QSD’ê Elî El Ehmed ê 3’yê Adarê li kantona Tebqayê şehîd bibû bi merasîmek hat veşartin. Ji bo şervanên Cebhet El Ekrad Mihemed El Taha û Nasir Xelîfe yên 8’ê Kanûna 2024’an li Minbicê şehîd bûbûn merasîma xiyabî hat lidarxistin. Merasîm bi amadebûna bi sedan şêniyên Tebqayê, koçberên ji kantona Efrîn-Şehbayê, endam û rêveberên meclîs û desteyên Rêveberiya Xweser, Partiya Sûriyeya Paşerojê, Kombûna Jinan a Zenûbiya, şervanên QSD’ê û Hêzên Ewlekariya Hundirîn li Pakrewangeha Şehîdan a bajarê Tebqayê hat lidarxistin.
Merasîm bi deqeya rêzgirtin û merasîma leşkerî ya şervanên QSD’ê destpê kir. Piştre ji fermandarên Hêzên Cebhet El Ekrad Mihemed El Elî axivî. Mihemd piştî sersaxî da malbatên şehîdan got: “Şehîd Mihemed di şerê li hemberî zilmê de tu carî tawazî nedida, zilma çeteyan a li ser gelê xwe qebûl nekir û di vê rêyê de li Minbicê şehîd bû. Şehîd Nasir û şehîd Elî El Ehmed jî ji destpêka avabûnê ve li herêmên Şehbayê cihên xwe di nava refên hêzên me de girt û beşdarî hemû pêngavên li dijî teror û çeteyan bûn.”
Mihemed El Elî di dawiya axaftina xwe de soza şopandina rêya şehîdan da û got: “Her şehadetek hêz û baweriya me zêdetir dike. Ji vî cihê pîroz em soz didin hemû şehîdên xwe û dayikên wan ku em ê heya dilopa dawîn a xwîna xwe şopdarên rêya wan bin.”
Di merasîmê de endama Meclîsa Reqayê ya Kombûna Jinan a Zenûbiya Ranya Bîtar sersaxî ji malbatên şehîdan re xwest û wiha got, “Bê guman her şehadetek ji bo gelê me yê berxwedêr windahiyek e, lê îsrara me ya domandina rêya şehîdan zêdetir dike.”
Serokê Weqfa Al El Beyet a kantona Tebqayê Ednan Îlwê bal kişand ser nirxên şehîdan di olan de û diyar kir ku şehadet rêya serkeftinê ye.
Piştre wesîqeyên şehîdan hatin xwendin û radestê malbatên wan hatin kirin. Di dawiyê de cenazeyê şehîd Elî El Ehmed bi dirûşme û tilîliyên dayikan spart axê.
