Jinên Wargeha Penaberan a Şehîd Rustem Cûdî Mexmûr bi pêşengiya Meclisa Îştarê 8’ê Adarê Roja Jinên Kedkar ên Cîhanê pîroz kirin. Tevahî jin û xwendekarên Mexmûrê bi cil û bergên xwe yên Kurdî li Navenda Çand û Hunerê kom bûn. Pîrozbahî bi deqeyek rêzgirtina ji bo şehîdên azadiya Kurdistanê destpê kir. Piştî rêzgirtinê endama Meclîsa Îştar Leyla Arzû Îlhan axivî.
Leyla Arzû Îlhan 8’ê Adarê li hemû jinan pîroz kir û wiha axivî: “Em roja 8’ê Adarê bi peyama Rêber Apo ya ji bo jinan pêşwazî dikin. Ev peyam ji bo me nexşerêya jiyana azad e. Em vê rojê di kesayeta şehîdên xwe de diyarê hemû jinên têkoşer dikin. Ger îro me serketinek bidestxistibe, ev bi saya keda jinên pêşeng û Rêber Apo ye. Rêber Apo azadiya jinê kir bingeha felsefe û bîrdoziya xwe. Peyama sedsalê ya Rêber Apo, hemû lêyistokên hêzên dagirker, vala derxist. Rêber Apo nêrgisên xaka Kurdistanê ji bo me jinan diyarî şand. Em wek jin dibêjin wê rojek hebe ku ev roj li ser xaka Kurdistana azad bi Rêbertiyek azad û bi rengê jinê bê xemilandin.”
Leyla Arzû Îlhan diyar kir ku bi dirûşmeya ‘Jin, Jiyan, Azadî’ zincîra koletiyê tê şikandin û bi van gotinan dawî li axaftina xwe anî: “Gelê Kurd û jinên Kurd bi pêşengtiya Rêbertî li dijî dagirkeran têdikoşîn. Jinên Kurd wê tucaran tarîtiyê qebûl nekin. Jin êdî bûne xwediyê bîrdozî û pergalek. Hêviya gelan û jinan xeta Rêber Apo ya bîrdoziya azadiya jin e. Wek jinên wargehê û jinên Kurd em ê bibin şopdara xeta azadî û demokrasiyê ya Rêber Apo û em ê bibin kedkarên jiyan û civaka azad.”
Piştî axaftinê, peyama Rêber Apo bi boneya 8’ê Adarê Roja Jinan a Cîhanê şand, hate xwendin.
Piştî xwendina peyamê, şanoya koma Jînim Jiyanim hate pêşkêşkirin. Piştî şanoyê, hunermedan derketin ser dikê û jinan li ber stranan govend gerandin.
