Xizmên windayan û Komeleya Mafê Mirovan (ÎHD) ji bo kesên di bin çavan de hatine windakirin bi daxwaza edaletê li Amed, Êlih, Colemerg û Îzmîrê çalakî pêk anîn.
COLEMÊRG
Çalakiya li navçeya Geverê ya Colemêrgê cara 166’emîn pêk hat. Di çalakiyê de Eren Baskin axivî û çîroka Nurettîn Turgut got. Baskin wiha axivî: “Darizandina faîlan û derxistina aqûbeta windayan di berpirsyariya vê hikûmetê de ye. Divê kujerên Nurettîn Turgut werin darizandin.”
AMED
Li Amedê jî cara 840’emîn a çalakiya ‘bila winda bên dîtîn û faîl bên darizandin’ hate pêkanîn. Di çalakiyê de aqûbeta Fîkrî Ozgen ku di sala 1997’an de hatibû windakirin hate pirsîn. Di çalakiyê de parlementera DEM Partiyê Adalet Kaya axivî û wiha got, “Di salên 90’î de me hemû şahidî jê re kir. Ev windakirin pratîkên suc ên dewletê bûn. Dewletê vê veşartî nekir, aşkere kir.”
ÊLIH
Li Êlihê jî xizmê windayan cara 676’emîn hatin ba hev. Di çalakiyê de pankarta ‘bila winda bên dîtîn, faîl bên darizandin’ hate vekirin. Di çalakiya vê heftê de kesên ku di komkujiya Helepceyê de jiyana xwe ji dest dan hatin bîranîn. Piştî daxuyaniya ku ji aliyê rêveberiya Komeleya Mafê Mirovan Huseyîn Elçî ve hatî dayîn, çalakiya rûniştinê pêk hat. Daxuyanî bi çalakiya rûniştinê re bidawî bû.
ÎZMÎR
Li Îzmîrê jî di çalakiya ku du hefteyan carekê tê kirin de, pankartên ‘winda wijdan in, lê xwedî derkeve’ û ‘faîl diyarin, winda li ku ne?’ hatin vekirin. Di çalakiyê de ji bo Hasan Ocak ê ku di sala 1995’an de hatibû windakirin hesab hate pirsîn.
Daxuyanî piştî çalakiya rûniştinê belav bû.
