Ji 6’ê Adarê ve li peravên Sûriyeyê li bajarên weke Laziqiye, Hûms û Tartûsê li hember xelkê Elewî yê sivîl ji aliyê kom û çeteyên tundrev ve êrîşên hovane tên kirin. Li gor çavkaniyan di wan êrîşên heya niha didomin, di nav wan de zarok û jin jî ku hene bi sedan mirovên sivîl hatine qetilkirin.
Li hember wan komkujî û êrîşan bertekên gelên Sûriyeyê jî didomin. Têkildarî mijarê yek ji gaziya şer Zîlan Hesekê nêrînên xwe anîn ziman.
Gaziya şer Zîlan Hesekê ya di destpêka axaftina xwe de êrîşên li peravên Sûriyeyê li hember xelkê sivîl ê Elewî pêk hatin bi tundî şermezar kir û got, “Xelkê me yê Elewî bi sedan salan e li vê erdnîgariyê dijî. Mirov nikare wan bi rejîma Baas a dîktator ve wekî hev bigire dest. Lê ew çeteyên tundrev jixwe ti nirxekî mirovatiyê esas nagirin. Bi hinceta ‘bermahiyên rejîma berê’ êrîşî sivîlan û bi taybet xelkê me yê Elewî dikin. Divê ti kes li hember van êrîş û komkujiyan bêdeng nemîne.”
Zîlan Hesekê diyar kir ku şervanên azadiyê yên Bakur û Rojhilatê Sûriyeyê li hember çeteyên DAÎŞ’ê berxwedaneke bêhempa meşandin û wiha domand, “Di encama vê berxwedan û têkoşîna di pêşengiya şervanên jin de dawî li çeteyên DAÎŞ’ê hat. Em ê dagirkeriyê jî teqez têk bibin. Ji bo Sûriyeyeke azad a li ser bingehê demokrasiya xwecihî divê hemû gel yekîtiya xwe xurt bikin. Tiştên îro desthilata HTŞ’ê ya li Şamê dixwaze li ser gelan û baweriyan ferz bike qet ne li gor heqîqeta Sûriyeyê ye. Sûriye ji gel û baweriyên pirreng pêk tê. Hemû gel û bawerî divê li ser esasekî wekhev û azad pêkve bijîn. Ji bo rê li ber komkujiyan bê girtin, pêwîst e weke gelên herêmê em yekîtiya xwe xurt bikin û li dijî hêzên tundrev xwedî helwest bin”
Gaziya Şer Zîlan anî ziman ku paradîgmaya ekolojîk demokratîk û azadîxwaziya jinan a Rêber Apo ji bo pêşerojeke azad a Sûriyeyê herî guncaw e û wiha axivî, “Di paradîgmaya Rêber Apo de hemû gel û bawerî dikarin di rêveberiyê de cih bigirin û têkildarî xwe biryarên herî baş bigirin. Paradîgmaya Rêbertiya me tenê ne ji bo Sûriyeyê ji bo tevahî Rojhilata Navîn karibe ji krîz û kaosa heyî derkeve derman e.”
Zîlan Hesekê axaftina xwe wiha bi dawî kir, “Pêwîst e di serî de jinên azadîxwaz, tevahî hêzên demokratîk û mirovhez li hember êrîşên li dijî xelkê me yê Elewî û êrîşên dewleta Tirk a dagirker ên li hember Bakur û Rojhilatê Sûriyeyê dengê xwe derxin. Bi yekîtî û rêxistinbûnê em ê karibin tevahî êrîşan têk bibin. Têkoşîn û berxwedana bi salan a Rêber Apo ev îspat û piştrast kiriye. Divê em ji xwe bawer bin û têkoşîna xwe heya serketinê bidomînin.”
