Komuna Fîlman a Rojava, têkildarî êrişên ser rojavayê Kurdistanê daxuyaniyek da û bang li hemû sînemageran kir ku piştevaniya bi Rojava re bikin.
Daxuyanî wiha ye:
“Hevalên hêja;
Deh sal berê, axa Rojava, bi bedelên giran, hemû mirovahiyê ji tirsa DAIŞ’ê, yek ji rêxistinên terorîst ên herî tarî di dîroka mirovahiyê de, rizgar kir. Rojava bi bîr xist ku ev hovên ku dixwestin vê barbariya serdema navîn li ser hemû mirovahiyê bixin jî, dikarin werin têkbirin, û divê qencî ji xerabiyê netirse. Bi Rojava re, li Rojhilata Navîn, tovên rizgariya jinan, jiyana hevbeş a mirovan, jiyana ekolojîk û demokrasiya rasterast, her çend bi xwînê hatibin avdan jî, bi israrî dest bi şînbûnê kirine.
Mixabin, ji ber ku ev nirx dijî berjewendiyên modernîteya kapîtalîst û emperyalîzmê bû, niha bi piştgiriya dewleta Tirkiyeyê bermahiyên DAIŞ’ê, HTŞ, danîn ser rejîma Sûriyeyê ya hilweşiyayî. Bi vê yekê, Amerîka û hêzên din ên kolonyalîst bi eşkere ragihandin ku ew naxwazin Kurd an jî sîstemek demokratîk li Rojhilata Navîn hebin.
Wekî ku tê zanîn, yekem kiryara hikûmeta demkî ya Şamê ew bû ku li dijî nasnameyên cûda yên li Sûriyeyê dijîn, wek Elewî û Durzî, komkujiyan pêk bîne. Îro jî wan bala xwe dane herêma Rojava. Dijminatiya dewleta Tirk a li hember Kurdan û dijminatiya DAIŞ’ê ya li hember nirxên mirovahiyê bûne yek û ew dixwazin vê jiyana ku bi bedelên mezin hatiye avakirin tune bikin. Ne tenê qirkirina fîzîkî, lê di heman demê de qirkirina jiyan, çand û hêviyê jî armanc dikin.
Parastina van nirxan û Rojava berpirsiyarî û erkê hemû mirovên xwedî wijdan e. Û divê cîhan nîşan bide ku ew hêjayî bedelê mezin ên ku Kurd û şoreşgerên li Rojava ji bo parastina nirxên mirovahiyê û rizgarkirina cîhanê ji tirsa hovitiyê dane ye.
Em, wek Komuna Fîlma Rojava, dizanin ku heta ku em rastiyên xwe nebêjin, derewên yên din dê bibin dîrok. Lê em ne bi tenê ne. Ev têkoşîn têkoşîna hevpar a hemû mirovahiyê ye. Û sînema zimanê herî gerdûnî yê vê têkoşînê ye.
Em bang li hemû çêkerên fîlm yê welatparêz, şoreşger û demokrat, hilberînerên fîlmên serbixwe, senarîst, derhênerên fîlman, edîtor û hunermendan dikin:
* Werin, em hevgirtina xwe xurt bikin.
* Zilma DAIŞ, HTŞ û dewleta Tirk û têkoşîna bi rûmet a li dijî wê di rojeva raya giştî ya cîhanê bihêlin.
* Di festîval, platform û atolyeyên xwe de cih ji bo têkoşîna Rojava vekin.
* Zanîna xwe ya teknîkî, ezmûn û hêza xwe ya afirîner bikin beşek ji vê vegotina kolektîf.
* Peyamên xwe yên vîdyoyê yên piştgiriyê li ser platformên civakî parve bikin.
Em şervanên ku dixwazin bi hêza dîmenan haqîqetê bînin ziman. Çekê rastiyê ji yê derewan tûjtir e, û em vê taritiyê; tenê bi ronahiya ku em bi hev re biafirînin dikarin ji holê rakin. Hevgirtina me ronîkera (projeksiyona) herî bihêz e ku dê perdeya berxwedana me ronî bike…
Bijî berxwedana Rojava!
Jin, jiyan, azadî!
Bijî sînemaya azad!”
