Li navçeya Rezan Amedê bi şîara ‘Rêbertiya Azad Civaka Demokratîk’ bi sed hezaran kes li Parka Newrozê hatin ba hev. Coşa Newrozê didome.
Ji Tifaqa Kurdistanî Mehmet Kamaç axaftina ewilî kir û diyar kir ku Kawayê Hesinkar li dijî Dehaqê zalim têkoşîna azadiyê dimeşîne.
Kamaç destnîşan kir ku banga Rêber Apo hêviya aştî û wekheviyê ye û got, “Demildest ji bo bersiva banga Birêz Ocalan, gav bavêjin.”
PEYAMA GIRTIYAN
Li qada Newrozê peyama girtiyan hate xwendin.
Peyama ku Parlamentera DEM Partiyê Sumeyye Boz xwendî, wiha ye:
“Silav ji bo bi milyonan kesên li Amedê kom bûne. Silav ji wan re yên ku li dijî Dehaqan çok natewandin, li hemberî zaliman serî netewandin, gelê me yê ku li hemberî bêmafiyan bêdeng nema. Silav ji wê îrade û qudretê re ya ku em kirine gelê Newrozê. Silav ji berxwedan, sekin û rêya Rêber Apo re. Em Newroza ku sembola herî xurt a berxwedan û hêviyê ye, pîroz dikin. Newroza we pîroz be.
Newroza Semayan, Viyanan, Ronahiyan, Zekiyeyan, Arînan, Gurbetelliyan, Binevşan, Veysiyan, Rahşanan, Zulkuf, Ûgur, Ayten û Çaran pîroz be. Em minetdarê wê ronahiyê ne ya ku li Amedê bi sê zilkên şiqartê belav bûyî û îro bûye meşaleya bi milyonan. Îro em li cihên cuda, lê bi heman hestê çîroka nû ya dîrokê pêşwazî dikin. Em hemû ruhê têkoşînê yê heman, parve dikin û heman êş û hêviyê dihilgirin.
Gelê me yê hêja,
Em ji dil piştgiriyê didin banga Rêber Apo ya çareseriya dîrokî û civaka demokratîk. Ev bang, di têkoşîna azadiyê ya gelê me de bingeh e û em ê bi gelê xwe re bi biryardarî parastina vê cesaret û îradeya aştiyê bidomînin.
Rêber Apo di Newroza 2013’an de dîsa li vê qadê got, ‘Yên ku ruhê demê fêm nekin, wê biçin sergoya dîrokê. Yên ku li ber herikîna avê li ber xwe bidin, wê ber bi valahiya bilindahiyê ve biçin’. Îro eger ruhê demê dibêje aştî, dibêje çareserî wê demê gelê Kurd ji vê re amade ye. Di siyaseta kûreyî de, hîn bêhtir polîtîkayên ewlekariyê, planên li ser esasê şer tên kirin. Di pêvajoyeke wiha de yê ku herî zêde fikriyeta aştiyê nîşan dayî, gavên vê yên pratîkî avêtî, bi berpirsyariya xwe pêşengtiya vê barê dîrokî yê mezin girtî ser xwe, Rêber Apo ye.
Banga Aştî û Civaka Demokratîk li vê xakê, li Kurdistanê, Mezopotamyayê, Anatoliyê, Çûkûrovayê, Egeyê, Marmarayê, Derya Spî, Rojava, Hewlêr, Rojhilat, li her devera ku dilê gelê Kurd lê dide deriyên biharê yê gelan vedike. Vê bangê zimanê bêdengkirî, xeyalên zincîrkirî û hêviyên binaxkirî ji nû ve şîn kir. Ev dem dema bindestan e, dema gelan e. Ev dem herî zêde dema Kurdan e. Ji bo bersiv ji vê bangê re bê dayin, divê gelê me sekna xwe ya bi biryar hîn xurt bike. Mecbûriyeteke ku şert û mercên Rêberê me di nav de ne tavilê bêne sererastkirin û tecrîd bê rakirin, ev yek pêwîstiyeke xwezayî ya herikîna jiyanê ye. Avdana darekê, afirandina şert û mercên şînbûnê ji bo wê darê bê çi wateyê, zemîna siyasî û hiqûqî ya vê pêvajoyê jî heman heqîqet e. Ev pêvajo bi afirandina rewşeke xumamî, bi belavkirina li pêvajoyê, bi hewldana tepisandina bi rêya zextê, bi çavtirsandina bi qeyûm û binçavkirinê nameşe. Ev rewş timî hatiye ceribandin û timî jî têk çûye. Ji ber vê yekê divê dest ji vê bê berdan û rêyên siyaseta demokratîk bêne vekirin. Roj roja xwedîderketina li nirxên civakî û rêbertî ye. Roja mezinkirina têkoşînê, meşa çareseriya mayinde ya bi rê û rêbazên nû ye. Newroza Amedê beyana îradeya ji bo aştî û çareseriyê ye. Weke girtiyên polîtîk ên azad em vê îradeyê silav dikin. Yên ku aştiya wan mezin be, destketiyên wan jî mezin e. Divê dewlet û desthilatdarî vê peyamê baş bixwîne. Bi vê bawerî, hişmendî, hest û hêviyê we hemûyan bi hurmet silav dikin. Hêvî dikin ku Newroza Azadiyê ya 2025’an bibe wesîleya saleke ji jiyaneke aştiyê û azadiya fîzîkî ya Rêberê me.”
