Serokwekîlê Meclîsê yê ji Partiya Demokrasî û Wekheviyê ya Gelan (DEM Partî) û endamê Heyeta Îmraliyê Sirri Sureyya Onder ku şeva 15’ê Nîsanê krîza dil derbas kir, li Nexweşxaneya Florence Nightingale 12 saetan hate emeliyatkirin û roja Çarşemê li beşa çavdêriya awarte ya nexweşxaneyê hate bicihkirin.
Doktorên Onder li ser rewşa wî ya dawî daxuyaniyek dan. Rektora ji Pêvajoyên Tibî yên Nexweşxaneyên Florence Nightingale Berpirsyar Prof. Dr. Çavlan Çîftçî anî ziman ku Onder niha bersiveke baş dide tedawiyê.
Çavlan Çîftçî got, “Daneyên gelekî baş dide. Gava ku ji vî alî ve mirov binirxîne, hingî dibîne ku bersiveke baş dide. 24 saetan wê bi cîhazê ve girêdayî be, lewma em ê hingî daneyên norolojîk hîn bi şênberî karibin parve bikin. Tansiyona wî normal e. Em di wê baweriyê de ne ku pêwîstiya me bi demê heye ku wê demeke dirêj dewam bike. Ev rewş cihê hêviyê ye.”
Çavlan Çîftçî da zanîn ku ji hêla Kardiyolojîk ve rewşa ventrîkula çepê baş e lewma tansiyona nexweşê wan a biçûk 60, ya mezin jî 110 e. Çavlan Çîftçî wiha domand: “Di ventrîkula rastê de li gorî doh tu ferq çênebûye. Pirsgirêk hêj didome. Jixwe me gotibû ku ji bo vê dem lazim e. Lê belê ji ber ku rewşa ventrîkula çepê baş e, ev yek hêviyê dide ku ji bo aliyê rastê bibe alîkar.”
Çavlan Çîftçî anî ziman ku tedawiya li beşa çavdêriya awarte bi vî awayî didome û wiha pê de çû: “Pêdiviya me bi demeke cidî û dirêj heye. Em herî zêde ji enfeksiyonê ditirsin. Lewma jî em antîbiyotîkên pir xurt didin nexweşê xwe. Îdrara wî baş derdikeve. Ji hêla gurçikê ve pirsgirêk tune ye.”
Çavlan Çîftçî axaftina xwe wiha qedand: “Tiştên em jê re dibêjin daneyên Norolojîk, nexweşê me bersivê didin hişyariyên me yên bijan. Dengan dibihîse. Em wate didin van bertekan û ev hêviyê didin. Ji ber ku piştgiriya ECMO’yê heye, ji hêla norolojîk ve em nikarin rewşekî tam a şênber raxin ber çavan. Carna başbûna ventrîkulên rastê 5, carnan 10, carnan jî 40 rojan diajo. Lê ji bo vî nexweşê xwe em dikarin bibêjin di navbera 10 heta 40’î de ye. Xetereya li ser jiyana nexweşê me didome.”
