Konferansa Parlamenterên Jin ên Kurd a 1’emîn ku li Navenda Kongreyê ya Çand Amedê pêk tê, dewam dike. Parlamentera Şirnexê y DEM Partiyê Newroz Ûysal moderatorî ji rûniştina bi navê “Di nava siyasetê de jin: Li 4 parçeyan û Ewropayê ezmûnên hevpar” re kir.
Parlamentera berê Leyla Zana li rûniştinê axivî û got, “Jin di nava çar dîwaran de bûn. Niha em dinihêrin, bûne mînak ji cîhanê re. Jinên cîhanê, jinên Kurd ji xwe re dikin mînak.”
Endama Rêveberiyê ya Yekîtiya Parlamenteran a kurdistanê Semîra Goran a ji Herêma Kurdistanê ya Federe tevlî konferansê bû, got “Yekîtî deriyekî girîng e. Serketinê ji konferanse re dixwazim.”
Ji Parlamenta Iraqê Kurda Emer jî hêviya xwe ya ji bo aştiyê ya li Tirkiyeyê û çareseriya pirsgirêkan li Meclîsê anî ziman.
Ji beşdarên konferansê endama Yekîtiya Parlamenterên Kurdistanê Kurdistan Pirdawid jî got, “Li Başûrê Kurdistanê divê jin bi roleke girîng rabin ku hêza xwe pêk bîne. Ji bo parastina mafan divê karibin li nava civakê û rêveberiyê de xwedî rol bin.”
Hevseroka Meclîsa Rêveber a Rêveberiya Xweser a Bakur û Rojhilatê Sûriyeyê Avîn Swêd jî bi rêya Zoomê tevlî konferansê bû û got, “Em di demeke dîrokî de ne. Berpirsyariyeke exlaqî û wijdanî dikeve ser milê me. Divê em destketiyên xwe biparêzin û li tevahiya Rojhilata Navîn û cîhanê belav bikin. Divê em civakeke demokratîk, ekolojîk û azadîparêziya jinê ava bikin. Jin bêdeng nînin. Weke jinên ji Bakur û Rojhilatê Kurdistanê em li her deverê têkoşînê dimeşînin. Ji bo parastina mafên xwe em dixebitin. Weke jinên ji Bakur û Rojhilatê Sûriyeyê em peyama Birêz Ocalan ji xwe re dikin esas. Ji hemû şer û pevçûnên li Rojhilata Navîn re çareseriyê pêşkêş dike. Divê jin pêşengiyê ji projeya civaka demokratîk û aştiyê re bikin.”
Rûniştina destpêkê, piştî nirxandinên beşdaran û beşa pirs û bersivê bi dawî bû.
