Nûnera Komelgeha Jinên Azad ên Rojhilatê Kurdistanê (KJAR) ya Ewropayê Meryem Fethî şerê Îran û Îsraîlê yê li Rojhilata Navîn diqewime, ji ANF’ê re nirxand û diyar kir ku jixwe bi salane şer heye. Meryem Fethî ev tişt got, “Ev şer li welatên mîna Iraq, Lubnan, Fîlîstîn û Sûriyeyê bi hêzên wekîl dihat domandin. Îran ji bo bibe hêza herêmî, demek dirêje ev şer bi vê rêbazê dida dewamkirin.
Li aliyê din, Îsraîl jî ji bo jinûve dîzaynkirina Rojhilata Navîn û bi piştevaniya hin hêzên navneteweyî û herêmî, dixwaze li herêmê hêza xwe ya hegemonîk zêde bike. Ji bo li hin herêmên cîhanê hêzên hegemonîk jinûve bên dîzaynkirin, li Rojhilata Navîn û Ûkraynayê şer tê meşandin. Niha ev şer, di navbera Îran û Îsraîlê de bûye şerekî rasterast. Îsraîlê, tesîsên enerjî û nukleer ên Îranê hedef girt; Îranê jî bersiv da. Di vî şerî de dîsa sivîl hatin hedefgirtin.”
Meryem Fethî destnîşan kir ku armanca vî şerî, li Rojhilata Navîn şerekî desthilatdariyê ye û wiha got, “Ne ji bo berjewendiyên gelan, ji bo sîstema kapîtalîst û mêrsalar li Rojhilata Navîn jinûve hegemonyayê çêbike. Teslimiyet li Îranê tê ferzkirin. Rejîma dîktator a li Îranê, êşkencekar û mirovan îdam dike, sîstemeke ku nêzî 50 sal in bi zilmê hebûna xwe didomîne.
Gelên li Îranê dijîn, li dijî vê rejîmê li ber xwe didin, lê belê ev şer ti feydeyê nade gelan. Şer dibe sedemê xizaniyê, hilweşîn, koç û parçebûna malbatan û ev yek bi kêrî bazirganên çek tê. Şoreşa ‘Jin Jiyan Azadî’ ya li Îranê, bandor li tevahî Îranê kir. Li dijî qetilkirina Jîna Emînî, gelê Îranê rabû ser piyan û îtîraz kir. Lê belê rejîmê, hewl da ku vê îtîrazê bi êşkence, girtîgeh û îdaman bi çewisîne, bi komkujiyên nû bersiv da.”
Meryem Fethî diyar kir ku li Rojhilatê Kurdistanê gel, ne alîgirê vî şerî ye û ev tişt bilêv kir: “Divê pozisyona me zelal be. Em ne alîgirê Îsraîl, ne yê rejîmê, ne jî yê dewletên ku sîstema kapîtalîst a navneteweyî temsîl dikin in. Em gel in, em alîgirê jin û ciwanên ku di bin zext û înkarê de têdikoşin, ji bo azadiyê şer dikin in. Lewma em têkoşîn û sîstemeke demokratîk û azadîxwaz diparêzin.
Gelek rêxistinên ku nûneriya Kurdan dikin û têkoşîna wan a rewa dimeşînin, Îran jî di nav de li welatên din em alîgirê sekneke siyasî ne ya ku têkoşîna gelê Kurd û gelên din esas digire. Lewma divê em rêxistinkirî û amade bin. Weke xelkê Rojhilat em ne alîgirê vî şerî ne. Ev şer bi armanca psikolojik û hegemonîk, tê meşandin.
Gelên me divê bi paradîgmayeke demokratîk û azadîxwaz xwe biparêzin. Ji bo vê yekê divê em xwe rêxistin bikin. Lê belê ev rêxistin, divê azadiya jinê û têkoşîna jinê esas bigire. Ji ber ku sîstema heyî li ser bingehê dijminahiya li hember jinê û azadiyê hatiye avakirin. Li dijî vê yekê têkoşîneke li ser esasê ciwan û jinan neçarî ye.
Rêxistinên mîna PJAK û KJAR’ê jî di daxuyaniyên xwe de nêrînên heman îfade kirin; destnîşan kirin ku wê gel biparêzin, lê ew ne alîgirê şer in.”
