Heyeta Ewropî ya ji 39 kesan daxwaznameya li ser daxwaza ji bo hevdîtina bi Rêber Apo re, radestî Buroya Hiqûqê ya Sedsalê ya li Stenbolê kir.
Heyet di çarçoveya kampanya ‘Ez dixwazim serdana Abdullah Ocalan bikim’ hat Tirkiyeyê.
Kampanya ji bo piştgiriya bi çareseriya demokratîk û aştiyane ya pirsgirêka Kurd û azadiya fîzîkî ya Rêber Apo tê lidarxistin ku dixwaze bala raya giştî ya cîhanê bikişîne ser mijarê.
Parêzerê Buroya Hiqûqê ya Sedsalê Îbrahîm Bîlmez spasiya heyetê kir û bi bîr xist ku Rêber Apo ji sala 1999’an û vir ve li Girtîgeha Îmraliyê di nava tecrîdeke giran de ye.
Bîlmez got, “Çareseriya pirsgirêkên bi vî rengî bingehîn, sosyolojîk û xwedî piştperdeya dîrokî, zehmet e. Pêwîstiya me bi sebrê heye, bi hewldanan heye û bi piştevaniyê heye. Ji ber vê yekê hebûna we ya li vê derê gelekî girîng e.”
Parlamentera Îtalyayî Francesca Cerasani bi navê heyetê axivî û got, “Em li vê derê ne ku nîşan bidin em piştgiriyê didin gel û Birêz Ocalan. Ev hêvî dikin ku ev hewldan wê mezin bibe; ji ber vê jî em li vê derê piştevaniya we dikin.”
