Wezîrê Karên Hundir Gerhard Karner, diyar kir ku ev biryar ‘di çarçoveya siyaseta penaberiyê hişk lê adilane’ de hatiye girtin û got, “Awûstûrya niha ne tenê sûcdarên ceza girtine bi awayekî sîstematîk dersînor dike, vê yekê li hember Sûriyeyê jî pêk tîne. Em ê vê rêyê bi biryardarî bidomînin.”
Awûstûrya ya ku piştî 15 salan gavek bi vî rengî avêt, îdia kir ku ew bi vê pêngavê ji ‘Ewropayê re pêşengî’ kiriye.
Karner, di dawiya Nîsanê de bi Wezîrê Karên Hundir ê Elmanyayê re serdana Sûriyeyê kiribû û li ser mijarên vegera penaberan û ewlehiyê hevdîtin kiribûn.
Piştî hilweşandina Beşar Esed di Kanûna 2024’an de, rewşa penaberên Sûriyeyî dîsa li Ewropayê bû mijara nîqaşan û gelek welat serlêdanên mafê penaberiyê dabûn rewastandin. Awûstûrya pêvajoya qanûnî da destpêkirin da ku statuya penaberiyê ya nêzîkî 2,900 Sûriyan betal bike û serlêdanên yekbûna malbatê bi tevahî rawestandiye. Tê plankirin ku ev pêngav li ser neteweyên din jî were berfireh kirin.
Hikûmeta ku di bin zexta FPO’yê de ye ku li dijî penaberan e, 1,000 euro pêşkêşî Sûriyan dike ku bi dilxwazî vegerin. Li gorî daneyên fermî, ji Kanûna 2024’an vir ve 350 Sûriyeyî vegeriyane welatê xwe, lê ev hejmar di salên 2023 û 2024’an de bi tevahî 200 bû.
