Jinên ji Wanê têkildarî peyama bi dîmen a Rêber Apo hest û fikrên xwe bi ajansa me re parve kirin. Jinan diyar kirin ku wê di vê pêvajoyê de rola xwe ya pêşengiyê û tevkariya xwe mezin bikin û li gorî ruhê pêvajoyê kar bikin.
Ji aktîvîstên Tevgera Jinên Azad (TJA) Hatîce Oktay anî ziman ku peyama Rêber Apo ne tenê ji bo Tirkiyeyê, ji bo tevahiya gelên Rojhilata Navîn kêliyeke diyarker e. Oktay diyar kir ku peyam bersivê dide pêwîstiyên civakî û got, “Ev banga ku piştî 26 salan hat, kelecaneke cidî da civakê. Gavek bû ku demeke dirêj dihate hêvîkirin. Ji bo afirandina zemîna vê yekê kedeke mezin hate dayin. Em îro di wê astê de ne ku berhema vê kedê werbigirin.”
‘BERPIRSYARÎ DIKEVE SER MILÊ HER KESÎ’
Oktay işaret bi aliyê navneteweyî yê peyamê kir û got, “Ev yek ne tenê bi sînorên Tirkiyeyê re eleqedar e. Li Îran, Sûriyeyê şer dewam dike. Ev bang ji bo gelên Rojhilata Navîn e. Rêbaz aştî ye û em amade ne piştgiriyê bidin vê aştiyê. Çi ji destê me bê em ê bikin. Di mijara aştiya civakî û rêxistinbûnê de derî li pêvajoyeke nû hate vekirin. Ev pêvajo divê bi gel re bê avakirin.”
‘BANG KÊLIYEKE DÎROKÎ YE’
Aktîvîsta TJA’yê Zeynep Kaya jî ragihand ku bang gavek bû ku bi salan dihate hêvîkirin û destnîşan kir ku berpirsyarî dikeve ser milê hemû beşên civakê. Kaya got, “Banga ku Birêz Abdullah Ocalan kir gelekî hêja ye. Divê em hemû xwedî li vê bangê derkevin. Ji bo ji jin, ciwan, gelê Kurd û gelên bindest ev peyam gelekî bi wate ye.”
Kaya diyar kir ku divê ne tenê gel, dewlet, partiyên siyasî û rêxistinên girseyî yên demokratîk piştgiriyê bidin vê pêvajoyê û got, “Divê pêwîstiya vê bangê bi cih bê anîn. Beriya ku hîn bêhtir xwîn û rondikên çavan bêne rijandin divê em têkoşînê mezin bikin. Di vê pêvajoyê de her kes divê bi rol rabe û bi hev re tevbigere. Dem ew dem e ku em bi hev re banga civaka demokratîk hîn mezin bikin. Aştî tenê bi têkoşîna hevpar û piştevaniya civakî dikare bê avakirin. Bang hem ji aliyê naverokê hem jî ji aliyê demê ve kêliyeke dîrokî ye.”
‘KELECANA WÊ NIKARE BÊ VEGOTIN’
Aktîvîsta TJA’yê Rojbîn Bor diyar kir ku peyama bi dîmen a Rêber Apo û banga aştiyê bi gotinan nikare bê vegotin, kêliyeke dîrokî ye û di nava civakê, bi taybetî jî bi jinan re hêvî û kelecaneke mezin afirand.
Bor anî ziman ku di şerê bi salan de jinan berdêla herî giran dan, jin ji azadiyê û ji qadên jiyanê bêpar hatin hiştin û got, “Xeleka herî kûr a xizaniyê jin e.”
‘PARADÎGMA JI BO TEVAHIYA ROJHILATA NAVÎN RONAHÎ YE’
Bor ragihand ku peyama Rêber Apo ji bo jinan ne tenê polîtîk e, di heman demê de xwedî wateyeke hebûnê ye û got, “Bi rastî jî ji bo jinan yekane rêya rizgariyê paradîgmaya Birêz Ocalan e. Em dibînin ku ev paradîgma îro ji bo tevahiya Rojhilata Navîn bûye hêviyeke nû.”
Bor destnîşan kir ku jin divê bibin hêmanê esasî yê pêvajoyên aştiyê û bi vî rengî dewam kir: “Dewlet di şevekê de dikarin li hev bikin an jî şer bikin, lê belê pozîsyona jinan bi vî rengî nîne. Lê belê di aştiyê de ku îro tê axaftin divê gotina jinan hebe. Weke jin, ne tenê jinên Kurd, femînîst, jinên di nava sîstemê de, her wiha polîseke jin jî divê di vê pêvajoyê de xwedî gotin be.”
‘DIVÊ HER KES BEŞDARÎ VÊ ÎRADEYÊ BIBE’
Bor destnîşan kir ku piştî banga aştiyê divê her kes berpirsyariya xwe bi cih bîne. Bor ragihand ku Rêber Apo yê ku 26 sal in tecrîdkirî yıe, peyameke xurt da û got, “Di nava şert û mercên ewqasî giran de eger dikare îradeyeke ewqasî xurt nîşan bide, divê her kes beşdarî vê yekê bibe. Ev pêvajo ne tenê ji aliyê siyasî, her wiha ji aliyê civakî ve jî guherînekê pêk tîne û pêşengên herî girîng ên vê yekê jî wê jin bin. Îro bi motîvasyoneke hîn mezin, bi hêz û baweriyeke mezin em ê têkoşîna xwe dewam bikin. Ev destketiya ku ji bo tevahiya Rojhilata Navîn hatiye destnîşankirin, ji bo jinan jî fêdeyeke mezin bîne, em bi biryar in.”
