Li navçeya Bayrampaşa ya Stenbolê ji ber ku malbateke muzîka Kurdî guhdar kir rastî êşkenceya polîsan hatin. Êrîşa li ser malbata Kurd li gelek bajaran hate protestokirin. Di çalakiyan de hate gotin ku ev êrîş li dijî jinan, ziman û çanda Kurdî hatiye kirin.
STENBOL
Li Stenbolê bi pêşengiya Komeleya Peşvêbirina Çand û Ziman (KURDÎ-GEH) tundiya polîsan a li Bayrampaşayê hat protestokirin. Gelek kes beşdarî daxuyaniyê bûn. Di çalakiyê de pankarta “Zimanê Kurdî xeta me ya sor e. Destên xwe jê vekişînin” hate vekirin. Gelek caran dirûşmên “Zimanê me rûmeta me ye”, “Bijî zimanê Kurdî” û “Bê ziman jiyan nabe” hatin berzkirin.
Rêveberê KURDÎ-GEH’ê Gokhan Işik diyar kir ku êrîş ne tenê derbkirin bû û got: “Ev tundûtûjî encama zîhniyeta baviksalar û mêran a dewletê ye. Em vê nêzîkatiya li hember jinên Kurd bi ti awayî qebûl nakin. Her êrîşek li ser ziman û çanda Kurdî êrîşek li ser nasnameya gelê me ye.”
ENQERE
Partiya Wekehvî û Demokrasiyê ya Gelan (DEM Partî), Tevgera Jinên Azad (TJA) û Komeleya Ziman, Çand û Hunerê ya Anka (ANKA-DER) der barê bûyerê de li Kolana Sakarya ya navçeya Çankaya daxuyanî dan. Di çalakiyê de pankarta “Kurdî xeta me ya sor e, destên xwe jê vekişînin” hilgirtin û dirûşmeyên “Ziman, Jiyan, Azadî” û “Bê ziman jiyan nabe” berz kirin.
Rêveberê ANKA-DER’ê Dogan Şenses daxuyanî xwend. Şenses diyar kir ku Zeynep Yalman a ku ducanî bû rastî êrîşa polîsan hat. Şenses bi brî xist ku Yalman bı awayeki lezgini rakirin nexweşxaneyê û pitik di beşa lezgînî de tê girtin. Şenses got ku ev êrîşa li ser jinan encama hişmendiya dewletê ya serdest û êrîşkar e.
ŞIRNEX
Bi pêşengiya DEM Partî û DBP’ê yên Qilabanê daxuyanî hate dayin. Girseya ku li ber avahiya DEM Partiyê ya navçeyê kom bûn, dirûşmeya “Bê ziman jiyan nabe” berz kirin. Hevserokê DEM Partî yê navçeyê Abdullah Gun daxuyanî xwend.
SEMSÛR
Komeleya Lêkolînên Ziman û Çanda Ferat (Ferat-Der) li ber Parka Mîmar Sînan a Semsûrê daxuyanî da. Di daxuyaniyê de pankarta “Zimanê Kurdî xeta me ya sor e” hat vekirin.
Hevserokê Ferat-Der Kazim Turhal diyar kir ku êrîş ne bûyerek takekesî ye, lê encama polîtîkayên asîmîlasyonê yên 100 salan e û got: “Ev bêtehamulî berhema dijminatiya domdar a li hember ziman û nasnameya me ye. Zimanê me xeta me ya sor e.”
SÊRT
Li Sêrtê êrîşên li ser zimanê Kurdî bi daxuyanî û meşekê hate protestokirin. Di meşa ku ji aliyê Komeleya Lêkolînên Ziman û Çandê ya Botanê (BOTAN-DER) û Tevgera Jinên Azad (TJA) ve hat organîzekirin, gelek nûnerên partiyên siyasî û rêxistinên civaka sivîl beşdar bûn. Girseyê pankarta “Zimanê Kurdî xeta me ya sor e. Destên xwe jê vekişînin” vekirin û heta avahiya DEM Partiyê meşiyan û timî dirûşmeyên “Zimanê me rûmeta me ye”, “Zimanê Kurdî hebûna me ye”, “Jin, Jiyan, Azadî” û “Bê ziman jiyan nabe” berz kirin.
Endamê BOTAN-DER’ê Mehmet Sait Toprak di çalakiyê de axivî û diyar kir ku êrîş ji zihniyeta serdest a mêran a sîstemê serbixwe nînin û got: “Em li hember van êrîşan bêdeng namînin. Em zihniyeta mêran şermezar dikin. Divê em li her derê parêzvaniya zimanê Kurdî bikin. Em bang li gelê Kurd dikin: li her derê stranên Kurdî guhdarî bikin.”
Daxuyanî bi çepik û berzkirina dirûşmeyan bi dawî bû.
ÊLIH
Li Êlihê jî bi pêşengiya Platforma Ked û Demokrasiyê ya Êlihê li Caddeya Gulîstanê daxuyanî hate dayin û êrîşên li ser zimanê Kurdî hate protestokirin. Di daxuyaniyê de pankarta “Em êrîşên li ser ziman û çanda Kurdî şermezar dikin” hate hilgirtin.
Rêvebera Komeleya Lêkolîn û Çanda Ziman a Arî (Arî-Der) Leyla Kaymaz diyar kir ku jin wê li dijî van êrîşan têbikoşin û got, “Zimanê Kurdî nasnameya Kurdan e. Em êrîşên li ser ziman û çanda xwe qebûl nakin û şermezar dikin.”
Daxuyanî bi çepik û berzkirina dirûşmeyan bi dawî bû.
AMED
Platforma Saziyên Demokratîk a Amedê li dijî tundiya polîsan a li ser zimanê Kurdî ber Plazeya AZC ya semta Ofîsa Yenîşehîrê ya Amedê daxuyanî da. Hevserokên DEM Partî û DBP’ê ya Amedê, endam û rêveberên sazî û rêxistinên civakî û gelek kes tevlî bûn. Di daxuyaniyê de pankartê “Zimanê me stranên me govenda me hebûna me ye, destên xwe jê vekişînin” vekirin û dirûşmeyên “Bê ziman jiyan nabe”, “Zimanê me rûmeta me ye” û “Bijî Serok Apo” hatin berzkirin.
Hevseroka DEM Partiyê Gulşen Ozer axivî û diyar kir ku malbatekî ji ber ku stranê Kurdî vekirîbû rastî êrîşa polîsan hat û got: “Em behsa aştiye dikin lê zimanê Kurdî rastî êrîşê tê. Em vê qebûl nakin em ê aştiye bi hev re bînin.”
