Rêxistina Efûyê ya Navneteweyî encamên rapora li ser revandina jinên Elewî li herêma peravê ya Sûriyeyê ku ji Sibata 2025’an vir ve pêk tê, amade kiribû eşkere kir.
Rêxistina Efûyê ya Navneteweyî ragihand ku li parêzgehên Tartûs, Laziqiyê, Hums û Hemayê ji destpêka Sibata borî ve revandin û windakirina bi zorê ya 36 jinên Elewî hatin belgekirin û daxuyand ku têkildarî van bûyeran tu pêşketinên şênber di lêkolînên fermî de çênebûne.
Efûya Navneteweyî hûrguliyên revandina 8 jinan belge kirin, bi raporên der barê revandina bi dehan jinan de, di nav de zarokên keçîn ku bi roj hatine revandin, şopandin. Li gorî raporê, ji hin malbatan fidye hatine xwestin. Her wiha hate destnîşankirin ku li gorî hin raporên din îhtîmal hene ku hin jin bi darê zorê hatine zewicandin an jî binpêkirin li dijî wan hatine kirin.
Di daxuyaniya Rêxistina Efûyê de hat destnîşankirin ku Mmlbatên hin mexdûran agahîname radestî polîsan kirine, lê tu bersivên fermî yan agahî wernegirtine. Hin malbat rastî muameleya xirab an giliyan hatin. Malbatekê jî hejmara telefona ku ji bo daxwaza dayîna fîdyeyê bi kar aniye ragihand, lê bê encam bû.
Rêxistinê ji hikumeta veguhêz a Sûriyeyê xwest der barê giliyên malbatan de agahiyên fermî pêşkêş bike, berpirsên van sûcan bigire, ji bo mîsogeriya parastina jinan ji revandin û binpêkirinan, tedbîrên lezgîn bigire.
