Rêxistina Mafê Mirovan a Kurdistanê derbarê rewşa girtiyên siyasî yên li Girtîgeha Merîwanê ya Rojhilatê Kurdistanê de, daxuyaniyek da.
Di daxuyaniyê de hate gotin ku berpirsên girtîgehê gefan li girtiyên siyasî yên li Girtîgeha Merîwan dixwin. Hate gotin ku girtî ji mafên xwe bêpar tên hiştin, rûbiruyî bêrêzî û bazariyê tên.
Rêxistina Mafê Mirovan a Kurdistanê da zanîn ku berpirsên girtîgehê ji bo teslîmbûn û şikandina îradeya girtiyan zextê li girtiyan dikin û hate gotin; “Ev rewş ne tenê binpêkirina rûmeta mirovan e, di heman demê de siyaseta hikumetê ya ji bo bêdengkirina dengê nerazîbûnên li Rojhilatê Kurdistanê ye.”
Rêxistina Mafê Mirovan a Kurdistanê navê berpirsên ku li Girtîgeha Merîwanê gefan li girtiyan dixwin belav kir.
Navê wan berpirsan wiha ye:
Berpirsê Parastina Girtîgehê Ferdîn Cîhanî, Rêveberê Nava Girtîgehê Mensur Xelwetî, Berpirsê Çandî yê Girtîgehê Reza Rustemî.
Hêjayî gotinê ye ku piştî agirbesta di navbera Îran-Îsraîlê de û heya niha li Rojhilatê Kurdistanê zêdetirî 318 welatî û çalakvanên Kurd ji aliyê îstîxbarata Îranê ve hatine binçavkirin.
