Hevseroka Desteya Çandinî û Aboriyê ya Kantona Firatê Sewsen Daban ji ANF’ê re axivî û got ku îsal li gelek navendên kantonê genim hatine wergirtin, lê kalîte û mîqdara berhemê kêm bû.
Sewsen Daban got ku, “Werzê çandiniyê yê îsal pir qels bû,” û wiha dewam kir, “Wekî Desteya Çandinî û Aboriyê ya Kantona Firatê, me amadekariyên pêwîst ji bo wergirtina genim kirin. Têkiliyên me bi rêveberên depoyan re jî hene. Karmendên me perwerdehiya pêwîst wergirtin. Me di 4’ê Hezîranê de dest bi wergirtina genim kir. Lê belê, ji ber demsala hişk berhemên bejî nebû, piraniya cotkaran giranî dan ser avdaniyê.”
HIN DEPO JI XIZMETÊ DERKET
Sewsen Daban, diyar kir ku hişkbûn û kêmbûna berheman li hin herêman bû sedema krîza genim û bandorên vê rewşê wiha vegot, “Piştî wergirtina berheman, me bi Saziya Veguhastin û Ajokaran re têkilî danî. Wesayît hatin amadekirin da ku genim bi rêkûpêk bigihînin embaran. Lê belê, embara Sirînê îsal ji ber êrîşa hêzên dagirker ên Tirk nekarî bixebite. Bi gelemperî, Sirînê dikaribû salê tenê bi qasî 8 hezar ton genim hilgire.”
BI GIŞTÎ 40 HEZAR TON HATINE WERGIRTIN
Sewsen Daban, da zanîn ku heta niha li seranserê Kantona Firatê bi tevahî 40 hezar ton genim hatiye wergirtin û hûrguliyê wê bi vî rengî parve kir, “Genimê ku ji herêma Eyn Îsa hatiye berhevkirin ji depoyên Gobiş û Galtayê re hatiye şandin (2 hezar ton). Hin cotkaran xwestine berhemên xwe rasterast bişînin herêma Tebqayê. Mîqdara kirînê li vê herêmê gihîştiye 1,300 ton. Kirînên herî mezin li depoyên Rovî û Çelebiye pêk hatin.”
Sewsen Daban, bi vî rengî dawî li axaftina xwe anî, “Tabloya giştî ya îsal ne dilxweşker e. Kirîna giştî herêmên Reqa û Tebqayê jî dihewîne. Em hêvî dikin ku sala bê berhemdartir be.”
