Li Îsraîlê tevgera muxalefeta li dijî şer li hemberî polîtîkaya Xezeyê ya hikumeta Serokwezîr Benyamîn Netanyahû çalakiyên xwe zêde kir. Aqûbeta 50 dîlgirtiyên di destê Hamasê de, bû sedema pêleke berfireh a muxalefeta civakî.
‘YA EM Ê NIHA RIZGAR BIKIN, YA JÎ WINDA BIKIN’
Xizmên dîlgirtiyan ji bo berdana dîlgirtiyên mayî zextê zêde dikin. Kampa şermezarkirinê ya nû ku wê roja Duşemê li ser sînorê Xezeyê bê avakirin, navê ‘Nuqteya Kontrolê ya 50’emîn’ lê hate kirin. Malbatan daxuyaniyek dan û gotin, “Em xizm û hezkiriyên xwe winda dikin. Eger em niha nikaribin wan vegerînin, em ê heta bi hetayê wan ji dest bidin” û bang li hikumetê kirin ku bikeve nava liv û tevgerê.
Li gel daxwaza muxalefetê jî Ofîsa Serokwezaretiyê bi zimanekî zelal li ber pêşniyara pevguhertina dîlgirtiyan û agirbestê ya Hamasê radibe. Hikumeta Netanyahû diyar kir ku ew ê tenê peymaneke li ser esasê berdana dîlgirtiyan hemûyan bi carekê, bêçekkirina Hamasê, xalîkirina Xezeyê ji leşkeran û kontrolkirina Îsraîlê ya ewlekariya sînor, qebûl bike.
Plana demkî ya agirbestê kua 60 rojî ku ji aliyê Nûnerê Taybet ê DYE’yê yê li Rojhilata navîn Steve Witkoff ve hate pêşniyarkirin, ji aliyê Netanyahû ve hate redkirin.
LI SERANSERÊ WELÊT GREV Û XWEPÊŞANDAN
Li ser vê yekê, Konseya Cotmehê ku malbatên dîlgirtiyan temsîl dike li seranserê Îsraîlê greva neteweyî û çalakiyên şermezarkirinê da destpêkirin. Di serî de Qada Dîlgirtiyan a li Tel Avîvê li gelek bajaran çalakî têne lidarxistin. Şaredarî, zanîngeh, fîrmayên tekolojiyê û bi sedan kargehan ragihandin ku wê tevlî grevê bibin.
Partiyên muxalefetê yên ku banga grevê kirin, ragihandin ku xwepêşandan di ser siyasetê re ye û banga piştevaniya bi malbatan li gel kirin.
Lîderê Yesh Atid Yair Lapid got, “Ev yek şerekî siyasî nîne. Ev yek meseleyeke însanî ye. Li ser daxwaza malbatan em dikevin grevê. Ji ber ku ev hinceteke têrker e.”
Ji Partiya Demokrat Yair Golan li ser hesabê xwe yê medya dîjîtal ragihand ku ew tevlî çalakiyên şermezarkirinê dibe û got, “Dem nema. Ji bo em wan niha bînin divê em her tiştî bikin.”
Parlamenterê DEM’ê Gilad Kariv jî got, “Nabe ku em li hemberî vê berpirsyariya hikumetê bêdeng bimînin. Greva herî mafdar ev e.”
LI XEZEYÊ AMADEKARIYA QONAXEKE NÛ
Li aliyê din, artêşa Îsraîlê (IDF) ji bo operasyoneke nû ya li ser Bajarê Xezeyê dest bi veguhestina malzemeyên stargehê û konan ji bo herêma başûr kir. Rayedaran îdîa kirin ku ev veguhestin ji bo dûrxistina sivîlan ji qadên şer hatiye kirin.
Di daxuyaniya COGAT’ê de hate gotin, alîkarî wê bi rêya Neteweyên Yekbûyî û saziyên din ên navneteweyî di ser Deriyê Sînor ê Kerem Şalon bêne şandin.
