Daxuyaniya ku gelek nûnerên partiyên siyasî û rêxistinên civaka sivîl jî tevlû bûn, pankarta “Em ê bi hev re aştî, hemwelatiya wekhev û sosyalîzmê bi dest bixin” hate daliqandin.
Berdevka Partiya Sor Candan Polat daxuyanî da û got ku ew di ferqa girîngiya pêvajoya piştî “Banga Aştî û Civaka Demokratîk” a Rêberê Apo dest pê kirî. Candan Polat diyar kir ku xurtkirina têkoşîna aştiyê ya di qada civakî de weke erk û berpirsyartiyeke şoreşgerî dibînin. Candan Polatê, da zanîn ku gelê Kurd ji bo mafên xwe yên wekhevî û azadiyê bedelên giran daye û tevgerên sosyalîst û şoreşger ên Tirkiyeyê jî piştgiriyê didin vê têkoşînê.
Bi domdarî Candan Polat bal kişand ser komîsyona li Meclisê hatiye avakirin û got ku divê xebatên wê zelal bin, gelên Kurd û Tirk tê de cih bigirin. Candan Polat got ku bêbaweriya gel a li dijî desthilatê hêj didome û ev bêbawerî ne tenê ji ber sepanên faşîst ên dîroka nêz lê di heman demê de ji polîtîkayên nûjen jî tê. Candan Polatê, got ku Partiya Sor, parçeyeke çalak a lêgerîna çareseriya wekhevîparêz a pirsgirêka Kurd e û ev pêşniyar rêz kir:
Pêşniyarên hatin kirin wiha ne:
“- Ji bo beşdariya xurt a gel û şefafiyê, divê zemîneke nîqaşên azad bê afirandin. Divê ev mercên nîqaşên azad, ji bo yek ji kirdeyên herî girîng a pêvajoyê Abdullah Ocalan jî derbasdar be.
– Hewceye mekanîzmayên ku fikir û têkoşîna aştiyê ya tevahiya partiyên siyasî, rêxistinên girseyî yên demokratîk, sendîkya û kirdeyên din ên dixwazin tev li pêvajoyê bibin, araste dike bên avakirin.
– Divê sepana tayînkirina qeyûm tavilê bê bidawîkirin û şaredar vegerin ser peywira xwe û yên girtî bên berdan.
– Di serî de girtiyên nexweş, divê hemû girtiyên siyasî yên bi hincetên cuda nayên berdan tavilê bên berdan. Divê beşeke mezin a civakê tev li pêvajoya çareseriyê bibe.
– Divê tevahiya astengiyên li pêşiya zimanê Kurdî bên rakirin.
– Divê di hemû pêvajoyên têkildarî aştiyê de nûnertiya wekhev a jinan bê misogerkirin û astengiyên li pêşiya tevlibûna wan bên rakirin.”
