Rojnamevan Nîhat Kaya di salvegera yekemîn a şehadeta Gulistan Tara de, axivî û diyar kir ku wî zêdeyî 20 salan Tara nas dikir. Kaya got, wê bi demê re li her qada çapemeniyê ked da.
Kaya anî ziman ku Gulistan di karê xwe de zû pêş ket û got, “Em piştre tevlî çapemeniyê bûn, lê Gulistan beriya me destpê kiribû. Ji roportajan heya nûçegihantiyê, ji wir heya televîzyontiyê gelek kar girtin ser xwe. Eger cidî û bi xwestek nebûya, ev qas pêş nediket. Eger carna encam baş dernekeve, ev ji nezanîna wê dihat, ne ji cidiyeta wê. Di rewşên wiha de yekser xwe lêpirsîn dikir: ‘Ez li vir têrker nebûm, çawa ez ê derbas bikim?’ Bi vê aliyê xwe bi rastî jî kesek mînak bû.”
Rojnamevan Kaya anî ziman ku yek ji taybetmendiyên esas ên Gulistan, ew bû ku ne tenê ji bo çapemeniyê ked da, di heman demê de ji bo mirovan jî ked da û destnîşan kir ku rojnamevaniya Gulistan Tara bi têkoşîna gel re bû yek. Kaya got, “Weke rojnamevanek Kurd, jinek Kurd û welatparêzek Kurd tevlî têkoşînê bû. Xwest îradeya gelê xwe ya di bin zextê de, rizgar bike. Gelek caran digot, ‘Çapemenî, ew e ku mirov tişta nayê dîtin nîşan bide, mirov îradeya tune tê hesibandin derxîne holê’. Ji ber vê yekê têkoşiya, xebitî. Û ji ber vê yekê hate hedefgirtin.”
Nîhat Kaya ragihand ku Tara pir dixebitî lê di heman demê de xwe ji çandê jî dûr nedikir û got, “Piranî mirov siharê saet 8 dest bi kar dikin, şev saet 6 dest ji kar berdidin. Lê Gulistan carna heya saet 9-10’ê şevê dixebitî. Ji ber ku bi bawerî dixebitî, wisa bû. Pir dixwend, guhdarî muzîkan dikir. Ez di vir de pir rexne dikirim. Digot, ‘Em hinekê li ser wêje û muzîkê jî baxivin’. Carekê ez ji ber zêdebûna kar teng bûbûm, xwe li min aciz kir û got, ‘Em li ser huner û muzîkê baxivin’. Divê mirov carna xwe îhmal neke. Ji vî alî ve rê nîşan dida.”
Kaya di dawî de wiha got: “Gulistan ji bo min heval û hevrê bû ku min derdê xwe jî pê re parve dikir. Hem ji bo min, hem ji bo hemû hempîşeyên wê windahiyek mezin e. Yekane rêya ku em bibin layiqê bîranîna wê, domandina têkoşîna wê ye. Ev jî encex bi cidiyet, ked û baweriyê dibe. Gulistan wiha jiyan kir, wiha xebitî. Erkê me ye ku em bibin layiqê wê.”
