15’ê Tebaxê ji bo her Kurdekî roja hebûn û vejînê ye. Lê fîşeka ewilî hebûna Kurdan hat misogerkirin û artêşa Kurdî hat ragihandin. Ciwanên Kurd jî êdî qefil bi qefil ji bo parastian bajar û axa xwe, tevlî nava tevgera azadiyê bûn.
Dayîka Şehîd Şîlan Kobanê, Fatme Hebeş têkildarî roja vejînê ya 15’ê Tebaxê ji ANF’ê re axivî. Fatme Hebeş diyar kir ku di her şahiya 15’ê Tebaxê de wan berê xwe didan saha Rêber Apo û li wir bi gerîlayên azadiyê re şahiya xwe pîroz dikirin û got, “15’ê Tebaxê bû, amadekariyên şahiyê dihatin kirin. Wê demê Şîlan ji zindana rejîma Sûriyeyê ya têkçûyî nû derketibû. Agahî ji min re hat ku Şîlan dibêje bila dayê were û em ê bi hev re wê şahiyê pîroz bikin, lê bila bi nasnameya xwe neyê ji ber ku dê ew jî were girtin. Dema min berê xwe da Lubnanê di cih de em çûn Akademiyê û li wir ji bo ku em şahiya xwe ya 15’ê Tebaxê pîroz bikin. Amadekariyên bi coş hebûn û her kes jî li benda wê şahiyê bû.”
Fatme Hebeş destnîşan kir ku hejmar zêdeyî 30 hezar kes bû û her kes jî bi wê coşê li wir bû. Fatme got, “Di deriyekî re ez çûm hevrêyên Şîlan li wir bûn û di cih de ji min pirsîn, gelo te Şîlan dît? Min jî got na. Sê rojan ez li wir bûm, di her rojê de hem bi Rêberê Apo re û hem jî bi şahî û bi civînan me 15’ê Tebaxê pîroz kir.”
Fatme got: “Rewşa Kurdan her di rojeva civîna me de bû. Kurdên ku navê mirinê li wan hatibû kirin, careke din xwe di 15’ê Tebaxê de îsbat kirin û li dijî wê mirinê serî hildan. Bi hezaran Kurd hatin qetilkirin. Mal û milkên wan hatin talankirin û şewitandin.”
Fatme anî ziman ku êdî navê mirinê li serê Kurdan hatibû sepandin û ev tişt bilêv kir: “Bi Tevgera Apoyî re hemû pergalên li ser Kurdan hatibûn ferzkirin, têk çûn û li şûna wê jiyaneke nû û hêviya azadiya tevahî Kurdistanê dibû rastî.
Fatme destnîşan kir ku roja 15’ê Tebaxê ne tenê çalakiyek bû, lê ew xelaskirina ji mirinê bû û got: “Min di xeyalê xwe de bawer nekir ku carekê em ê di nava Kurdistaneke azad de jiyan bikin. Li zarokên min zimanê Kurdî qedexe bû. Heta bi stranên Kurdî jî qedexe bû û li malê me nikarî stranan bi zimanê xwe guhdar bikin.”
Fatme diyar kir ku fîşeka şehîd Egîd ne tenê Kurd ji xewê û mirinê şiyar kir, cîhan tevahî jî hejand.
Fatme di dawiyê de got ku ew serbilindin û destnîşan kir ku bi fikra Rêber Apo ew ê her tim bijîn.
