Konferansê bi deqeyek rêzgirtina ji bo giyanê şehîdan destpê kir. Axaftina vekirinê ji aliyê Wezîrê Rewşenbîrî û Lawan ê hikûmeta demborî ya Herêma Kurdistanê Hemey Heme Seîd ve hat kirin.
Piştre Şêwirmendê Wezîrê Xwendina Bilind Dr. Amanc Seîd jî li ser rol û giringiya wêje, huner û çapemeniyê ya di nasandina jenosîdên li ser gelê Kurd pêkhatine axivî. Amanc Seîd got: “Pêwîste bi rêya huner, wêje û çapemeniyê dîrok, rastî û êşên ku gelê Kurd kişandine nîşanî cîhanê û nifşên siberojê bidîn.”
Piştre Waliyê Silêmaniyê Heval Ebûbekir jî axaftinek kir û got: “Jenosîd berhemê zilma ku ferzkiriye ye, qebûl nekirina dengên cûdaye ku li beramberî gelê Kurd hatî kirine. Ji bilî tinekirina mirovan jenosîd li beramberî jîngeha Kurdistanê jî hatiye kirin û hewla bişaftinê hatiye dayîn. Ji bona wê pêwîste bi pênûsa Kurdî li ser asta navdewletî jenosîd bê nasandin. Pêwîste rêz li wan kesên ku tawanê enfalê li beramberî wan hatine kirin, bê girtin. Her wiha divê dosya enfalê ji beriya hemû karên din kar li ser were kirin.”
Di dewamê de Heval Ebûbekir da zanîn ku piştî bi salan dijminahiya Kurdan hat kirin û cîhan hemû hemfikirbûn ku Kurd werin bişaftin, lê Kurdan karî li ser lingên xwe bisekinin. Ebûbekir got: “Niha li Başûrê Herêma Kurdistanê heye, li Rojava sîstema Rêveberiya Xweser heye û li Bakur jî pêvajoya aştiyê heye. Ji bona wê nabe Kurd carek din rê bidin ku bi rêya nakokiyên navxweyî û şerê birakujî ev karesat dubare bibin. Ji bona wê divê Kurd yekgirtina xwe çêkin.”
Di dirêjiya konferansê de Nivîskar Dr. Mihemed Elî Sultanî jî axivî û got: “Divê dewletên dagirker û serdest bizanin ku gelekî xwdî ferheng, wêje û hunerê ti demê nayê bişaftin. Divê hewl bê dayîn li ser asta navdewletî jenosîdên bi serê Kurdan hatine werin nasandin. Pêwîste hewldanên di vê çarçoveyê de tên kirin bihevre bên meşandin û daxwaza qerebûkirina (Tazmînat) gelê Kurd bê kirin. Pêwîste yasayên navdewletî yên ku taybetin bi jenosîdê wergerî ser zimanê Kurdî bê kirin.”
Biryare Konferansa Jenosîda Kurd du rojan berdewam bike û têde gelek mijarên giring ên taybetin bi jenosîdên Kurdan bên nîqaşkirin.
