Şandeya ku ji Hevserokê Partiya Wekhevî û Demokrasiyê ya Gelan (DEM Partî) Tuncer Bakirhan, Hevserokên Partiya Herêmên Demokratîk (DBP) Keskîn Bayindir û Çîgdem Kiliçgun Uçar, parlamenterên DEM Partiyê û Înîsiyatîfa Yekîtiya Demokratîk pêk dihat, beşdarî Kongreya Hevpeymaniya Sosyal Demokrat a Welatên Erebî ya li Silêmaniyê bûn. Gelek siyasetmedarên ji Rojhilata Navîn û çar aliyên cîhanê di konferansa ku wê 4 rojan bidome de hatin ba hev.
Di rûniştina ku ji hêla Basel Kamel ve hate birêvebirin de Hevserokê DEM Partiyê Tuncer Bakirhan, endamê Konseya Serokatiyê ya Partiya Yekîtiya Demokratîk (PYD) Salih Muslim û Cîgirê Serokwezîrê Herêma Kurdistanê Kubat Talabanî axivîn.
Bakirhan bal kişand ser rewşa Kurdan ya li Bakurê Kurdistanê û Tirkiye û got: “Bi deh hezaran kes tenê ji bo parastina ziman, nasname û mafê gelê xwe û siyaseta Kurdî hatine girtin.”
Bakirhan bibîr xist li Tirkiye bi banga Rêber Apo re Pêngava Aştiyê dest pê kir û wiha pêde çû: “Em dixwazî dawî li siyaseta tinekirinê ya 100 salî bînin. Dixwazin Komareke Demokratîk ava bikin. Eger ev pêngav bi ser bikeve, wê dawî li siyaseta tinekirinê were, dawî li karên nehiqûqî yên li ser muxalefet û Kurdan were û hemû girtî bên azadkirin.”
Bakirhan nêzîkatiya hikûmeta Tirkiye ya li ser zimanê Kurdî rexne kir û got: “Bi milyonan Kurd li Bakurê Kurdistan û Tirkiyeyê hene, nikarin bi zimanê xwe baxivin. Li komisyona ji bo pêvajoya aştiyê hatiye avakirin jî rê nehate dayîn dayikek bi zimanê Kurdî baxive nêzî 25 milyon Kurd li Tirkiye nikarin bi zimanê xwe baxivin. Zimanê wan qedexe ye.”
Hevserokê DEM Partî Tuncer Bakirhan bal kişand ser tecrîda li ser Rêber Apo û wiha got: “Avakarê Pêngava Aştiyê Birêz Abdullah Ocalan hê jî di bin tecrîdê de ye. Hê jî siyaseta tinekirinê ya sed salî dewam dike. Em ê dev ji xebata me dayî destpêkirin bernedin.”
Herî dawî Bakirhan anî ziman ku eger pêngava aştiyê bi ser bikeve wê bandora wê li Rojavayê Kurdistanê jî bike û got: “Dixwazin sîstemeke demokratîk li Sûriyeyê bê avakirin.”
ŞANDE BI TALABANÎ RE CIVIYA
Li gorî Nivîsîngeha Ragihandinê ya Serokê Yekîtiya Niştîmanî Kurdistanê (YNK), Serokê YNK’ê Bafil Talabanî li Navenda Mekteba Siyasî ya li Silêmaniyê pêşwazî li Şandeya DEM Partî û DBP’ê kir.
Bafil Talabanî qala girîngiya pêngava aştiyê ya li Bakurê Kurdistanê û Tirkiye kiriye û got: “Em girêdayî pîvanên Mam Celal a ji bo pêşvebirina xwişk-biratiyê ne û em ê hewldanên xwe yên ji bo serketina vê pêngavê zêdetir bikin. Ji ber ku ev dikeve xizmeta temamê gelên herêmê.”
Di hevdîtinê de qedexeya li ser Balafirxaneya Silêmanî hate rojevê. Şandeyê xwest ku qedexe bê rakirin.
