Cenazeyê şervanê Hêzên Rizgariya Efrînê (HRE) Rizgar Aqîbê (Mihemed Eseed Talib) yê 25’ê Tebaxê dema li ser erka xwe bû li bajarê Mansûra yê Kantona Reqayê şehîd bûbû, li Goristana Şehîdên Berxwedana taxên Şêxmeqsûd û Eşrefiyeyê bi merasîmekê hat veşartin. Şêniyên taxên Şêxmeqsûd û Eşrefiye yên Helebê û koçberên Efrînê tevlî merasîmê bûn.
Endama Meclîsa Malbatên Şehîdan û dayika şehîd Şoreş Amne Xidro axivî û got: “Zarokên me ji bo parastina ax û rûmetê, canê xwe feda kirin.”
Endamê Rêveber ê Meclîsa Olî şêx Elî El Hesen jî axivî û got: “Maf bi rîca û hêviyê nayên xwestin lê bi xwîna şehîdan tên bidestxistin. Şehîd di dil û bîra me de nemir in.”
Endamê rêveberiya Hêzên Ewlekariya Hundirîn Zagros Heleb jî soz da ku rêya şehîd Rizgar bidomîne.
Xizma şehîd Rizgar Aqîbê, Nehle Mistefa axivî û got: “Şehîd Rizgar, wefadar bû. Dilsozê doz û hevalên xwe bû. Bi gelê xwe re rast bû. Bê teredud û bê dudulî li eniyên şer têkoşiya û giyanê xwe fedayî welat û gelê xwe kir.”
Di dawiya merasîmê de wesîqeya şehadetê ya şehîd hate xwendin û radestî malbatê hate kirin.
Cenazeyê şehîd Rizgar Aqîbê bi dirûşmeyan hat veşartin.
