Bakirhan ji rojnameya Yenî Yaşamê re axivî, nerazîbûn nîşanî daxuyaniyên gefxwarinê yên lîderê MHP’ê Devlet Bahçelî û Berdevkê AKP’ê Omer Çelîk ên li hemberî Rêveberiya Xweser a Bakur û Rojhilatê Sûriyeyê û got, “Pirsgirêk bi diyaloga li ser bingeha heq û hiqûqê çareser dibe, ne bi gefên operasyonê.”
Bakirhan got, “Li vê erdnîgariyê ji bo têkiliya xwişk û biratiyê ya Tirk, Kurd, Ereb û Fars bê xurtkirin, beriya her tiştî divê pîvana wekheviyê bê pejirandin. Bendewariya bi milyonan Kurdan ên li Tirkiyeyê ye ku Tirkiye statu, rûmet û mafên rewa yên gelê Kurd ên li welatên cîran biparêze.”
Hevserok destnîşan kir ku bêyî dayina garantî û statuya Kurdan bangên li ser ‘teslîmbûnê’ dûrî edalet û aştiyê ye.
Bakirhan anî ziman ku Rêber Apo bi perspektîfa ‘Neteweya Demokratîk’ a bi salan ji bo Tirkiye, Sûriye û Rojhilata Navîn çareseriyeke aştiyane pêşkêş dike û got, “Aqlê ku Birêz Ocalan vexwend Meclîsê divê li pêşniyarên çareseriyê yên Birêz Ocalanv ekirî be û karibe nîqaş bike.”
Bakirhan tayînkirina qeyûm li ser Serokatiya Bajarê Stenbolê ya CHP’ê û operasyonên dadgeriyê yên dema dawî jî nirxand û destnîşan kir ku ev kiryar ne hieqûqî ye û li dijî demokrasiyê ye.
Bakirhan ji bo CHP’ê got, “Em ê bi hev re meseleya Kurd çareser bikin û Tirkiyeyê bi hev re demokratîk bikin. Wekî din çareya me nîne.”
