Wêneyên peykê yên dawî yên NASA’yê nîşan dan ku Gola Ûrmiyê ku li bakûr-rojavayê Îranê ye bi tevahî ziha bûye. Gola Ûrmiyê ku demeke dirêj wekî duyemîn gola xwê ya herî mezin a cîhanê dihat naskirin. Ji ber zûhabûnê û rêveberiya nebaş a avê û bendavên ku li derdora golê hatine çêkirin bi salan hêdî hêdî piçûk bû û niha bi tevahî winda bûye. Herêma ku gol lê bû, niha veguherîye erdekî çol û berfireh ku bi xwê hatiye nixumandin.
Rojnameya Ettelaat a Îranê di hejmara xwe ya 7ê Îlonê de nivîsî ku zûhabûna golê pêşbîniyeke çaverêkirî bû. Di nûçeyê de hat bibîrxistin ku parêzvanên jîngehê û pisporan di destpêka havînê de hişyarî dabûn ku heta dawiya havînê golê bi tevahî ziha bibe. Li gorî pisporan zûhabûna golê dê bibe sedema windahiyên mezin di dahatên tûrîzmê de. Her wiha bahozên xwê yên ku dê derkevin holê, dê li herêmên rojhilat û başûr-rojhilatê golê bandoreke neyînî li ser çandiniyê û şertên jiyanê bike.
Hikûmeta Îranê di salên dawî de ji bo parastina golê gelek projeyên cihêreng pêş xistine. Lêbelê, ji ber zihabûna domdar û têkçûna avên binerd ev hewldan encam nedane.
