Ji têketinên rêyên Parîsê heya xaçerêyên bajarên mezin ên weke Rennes û Nantesê, ji lîseyan heya zanîngehan û kargehan li gelek deveran çalakiyên blokaj û protestokirinê hatin lidarxistin.
Wezîrê Karên Hundirîn Bruno Retailleau diyar kir ku li seranserê welêt 80 hezar polîs û cendirme, wesayîtên zirxî û helîkopter hatine seferberkirin.
Li gorî Wezareta Perwerdeyê bûyeran bandor li nêzîkî 100 lîseyî kiriye û 27 lîse jî bi temamî hatine blokekirin. Bes îro li Parîsê 171 kes û li seranserê welêt jî bi tevahî 295 kes hatine binçavkirin. Ji saet 11.00’an pê ve 430 çalakî hatine lidarxistin ku 273 ji wan meş in û 157 jî çalakiyên blokajê ne.
Li seranserê welêt li 105 cihên cuda şewat derketine û çar polîs jî bi sivikî birandar bûne. Li Ardennesê jî du wesayît bi temamî şewitîn û li Charenteyê jî dîrekeke telekomunîkasyonê hate şewitandin.
LI MARSÎLYAYÊ 80 HEZAR KES MEŞIYAN
Li Marsîlyayê deh hezaran kes meşiyan. Li gorî sendîkaya CGT’yê 80 hezar welatî beşdarî meşê bûne, li gorî organîzatoran jî ev hejmar 30 hezar e û li gorî walîtiyê jî 8 hezar kes beşdarî meşê bûne. Korteja ku ji xwendekar, teqawid û karkeran pêk dihat, ji navenda bajêr dest bi meşê kir.
Li bajarên weke Paris, Montreuil, Strasbourg û Montpellierê jî wê tevahiya rojê meş werin lidarxistin. Bi taybetî jî li Parîsê girseyeke mezin li hev civiya.
