Hevserokê GOÇ-DER’ê Mûrat Sari, ku beşdarî civîna Komîsyona Hevgirtina Neteweyî, Xwişk-Biratî û Demokrasiyê bû, diyar kir ku ji bo vegera gundan pêdivî bi rêziknameyên hiqûqî hene.
Komîsyona Hevgirtina Neteweyî, Xwişk-Biratî û Demokrasiyê ku bi mebesta çareserkirina pirsgirêka Kurd bi rêyên siyasî û hiqûqî li meclîsê hat avakirin, li derdorên cuda guhdarî dike. Komîsyon di civîna xwe ya 11’emîn de ku di 18’ê Îlonê de pêk hat, Hevserokê Komeleya Çavdêrî û Lêkolînên Koçberiyê ya Mezopotamyayê (GOÇ-DER) Mûrat Sari jî guhdar kir.
Hevserokê GOÇ-DER’ê ji ANF’ê re axivî û got, “Avakirina komîsyonê em watedar dibînin. Em bawer dikin ku ew ê di warê avakirina aştiyeke bi rûmet û mayînde de girîng be. Me hem nirxandin û hem jî daxwazên xwe ji Komîsyonê re kir û raporek pêşkêş kir.”
‘DIVÊ ASTENGIYÊN LI PÊŞIYA VEGERAN BÊN RAKIRIN’
Sari, bal kişand ser koçberiyên bi darê zorê yên ku di salên 1990’î de pêk hatin û diyar kir ku nêzîkî 3 hezar û 700 gund û mezra hatine valakirin. Sari got, “Mirov bi zorê hatin koçberkirin. Ji bo vê yekê divê şert û merc li gorî wê bên amadekirin. Ev yek jî bingehên pêvajoya aştiyê yên esasî ne. Me daxwaza rakirina astengiyên li pêşiya vegerê kir. Me banga avakirina edaleteke mayînde û sererastkirinê kir. Weke ku me di rapora xwe de diyar kir, divê çarçoveyeke qanûnî jî ji bo vegera kesên ji Mexmûrê bê avakirin. Divê sîstema cerdevanî bê rakirin, ji ber ku ev sîstem pêşî li vegera gundan digire.”
‘DIVÊ RÊGEZÊN QANÛNÎ BÊN AMADEKIRIN’
Sari, diyar kir ku rêziknameyên qanûnî ji bo vegera gundan dê pêvajoyê xurt bike û anî ziman ku ger ev rêzikname werin bicîhanîn, mirov dikarin vegerin ser erdên xwe, ku ev yek dê ji bo pêvajoya aştiyê motîvasyonek xurt be.
