Li Tirkiyeyê nîqaşên li ser çareserkirina pirsgirêka Kurd, ku bi salan e berdewam dike, didome. Siyasetmedar Dr. Hişyar Ozsoy, pêvajoya aştiyê ya salên 2013-2015’an bi pêvajoya “Aştî û Civaka Demokratîk” a heyî re muqayese kir û bal kişand ser gavên ku divê ji bo aştiyeke mayînde werin avêtin.
Ozsoy, diyar kir ku meşandina pêvajoyê li pişt deriyên girtî baweriyê têk dibe û got, “Pêvajoyeke girtî û nezelal metirsiya hilweşîna maseyê di her kêliyê de zêde dike.” Ozsoy, bal kişand ser pêwîstiya çareseriyeke civakî û rola çalak a Komîteya Mirovên Aqilmend di salên 2013-2015’an de.
Ozsoy, diyar kir ku aştî ne tenê divê aliyên ewlehiyê, di heman demê de aliyên çandî û demokratîk jî bigire nav xwe û got, “Pêvajo bi çekdanînê ve sînorkirî tê dîtin, lê pirsgirêk pir berfirehtir e. Aliyên siyasî, çandî û demokratîk vedihewîne.”
‘ÇEK DANÎN FIRSENDEKE DÎROKÎ YE’
Ozsoy, ku biryara PKK’ê ya danîna çekan wekî “firsendeke dîrokî” bi nav kir got, “Çekdanîn ne tenê pirsgirêkek ewlehiyê ye; ew destpêkek e ku qada qanûnî û siyasî vedike ku diçe ser koka pirsgirêka Kurd.” Ozsoy, destnîşan kir ku ev gav dikare rê li ber pêvajoyek aştiyê ya berfirehtir veke.
Ozsoy, anî ziman ku tenê bêdengkirina çekan têrê nake û banga gavên şênber ên wekî berdana girtiyên siyasî, vegera sirgûnan û qanûnên entegrasyona demokratîk kir.
‘GAVÊN LEZGÎN ÊN QANÛNÎ Û SIYASÎ’
Ozsoy, da xuyakirin ku tevî ku pêvajo salek e berdewam dike jî, ti gavên berbiçav nehatine avêtin û wiha rexneyên xwe rêz kirin, “Girtî hîn jî azad nînin û biryarên DMME’yê nayên bicîhanîn.” Ozsoy, diyar kir ku divê pêşniyarên komîsyonê demildest di jiyanê de were pêkanîn.
Ozsoy, da zanîn ku hikûmet hewl dide pêvajoyê bi rengekî yekalî birêve bibe û got, “Me çi ji destê me hat kir, niha em li bendê ne ku dewlet tedbîran bigire” û destnîşan kir ku berpirsyarî li ser milê dewletê ye.
Ozsoy, behsa girîngiya tevlîbûna Rêber Apo ya ji bo pêvajoya aştiyê bi rengekî azad kir, gotinên Bahçelî yên ji bo ‘Mafê hêviyê’ bibîr xist û got ku divê di vî warî de gav werin avêtin.
‘WINDAKIRINA DEMÊ JI BO PROVOKASYONAN ZEMÎN ÇÊDIKE’
Ozsoy, ji ber giran rêveçûna pêvajoyê fikarên xwe anî ziman û got, “Ev nêzîkî salekê ye ku pêvajoya aştî didome, lê gavên berbiçav nehatine avêtin Windakirina demê ji bo provokasyonan zemîn çêdike.” Ozsoy, bal kişand ser xwezaya krîtîk a du mehên pêş de û diyar kir ku heke di Cotmeh û Mijdarê de gavên watedar neyên avêtin, pêvajo “dikare heta bihareke din were paşxistin.”
Di dawiyê de, Ozsoy behsa girîngiya beşdariya civakî kir û got, “Divê pêvajo ne tenê karê dewlet û PKK’ê be. Divê civak gav bavêje û zextê li hikûmetê bike.”
