Di bin dirûşma ‘Tekane Şikestina Hêza Komplo û Komplogeran Jiyana Komînal e, Jiyandina Fikir û Ramanên Rêbertiyê ye’ de Meclisa Îştar a wargeha penaberan a Şehîd Rustem Cûdî (Mexmûr) bi daxuyaniyekê li dijî biryara mafê hêviyê, neçûyîna komîsyonê li gel Rêber Apo û komploya 9’ê Cotmehê starta rêzeçalakiyên xwe dan.
Daxuyanî li Saziya Malbatên Şehîdan bi deqeyek rêzgirtin ji bo tevahî cangoriyên azadiya Kurdistanê hat destpêkirin. Piştî rêzgirtinê Koordînasyona Meclisa Îştar a Mexmûrê Qîmet Nerexî axivî û starta rêzeçalakiyan ragihand.
Qîmet Nerexî di destpêkê de bal kişand ser komploya 9’ê Cotmehê û ev tişt got: “Di 9’ê Cotmeha sala 1998’an de li hemberî Rêbertî komployek pêk hat. Ev komplo ne tenê li hemberî Rêbertî, li hemberî vîna gelê Kurd hat pêkanîn. Xwestin di şexsê Rêbertî de gelê Kurd, nasname û hebûna gelê Kurd tune bikin. Lê komplo bi têkoşîna Rêbertî û sekna gelê Kurd hat vala derxistin.”
Qîmet Nerexî destnîşan kir ku bi pêngava rêzeçalakiyên li dijî komployê diyar dikin ku ne komplo ne jî komploger tu caran nagihîjin armancên xwe û wiha berdewam kir: “Di bin pêşengiya Meclisa Îştar de em weke jinên wargehê bi şîara ‘Tekane Şikestina Hêza Komplo û Komplogeran Jiyana Komînale, Jiyandina Fikir û Ramanên Rêbertiyê ye’ li dijî biryara mafê hêviyê, rêzeçalakiyan didin destpêkirin. Weke rêzeçalakî wê mehek çalakiya nobetê ji aliyê jinan ve were dewrgirtin, semîner werin dayîn, platform werin lidarxistin û roja 9’ê Cotmehê jî bi pêşengiya jinan wê komplo bi meşek were şermezarkirin.”
Qîmet Nerexî di dawiyê de diyar kir ku ewê jin û gelê Kurd têkoşîna xwe ya ji bo azadiya fîzîkî ya Rêber Apo bi biryardarî bidomînin û xwe bigihîjînin azadiyê.
Daxuyanî bi dirûşmeyan dawî bû.
