Tevgera Jinên Azad (TJA) meşa xwe ya bi dirûşmeya “Em bi hêviyê ber bi azadiyê ve dimeşin” ku ji bo azadiya Rêber Apo dest pê kiriye, didomîne. Di roja duyemîn a meşê de, ku li Amedê dest pê kir, jin ji Jurnê Reşê berê xwe dan Helfetî ya Rihayê.
Ji bo meşê peyama hevgirtinê ji herêma Bakur û Rojhilatê Sûriyeyê jî hat. Endama Konseya Serokatiyê ya Partiya Yekîtiya Demokratîk (PYD) Foza Yûsûf, diyar kir ku têkoşîna hevpar a jinan “Dê bibe mifteya vejîneke nû ji bo Rojhilata Navîn.”
Peyam Foza Yûsûf bi vî rengî ye:
“Bi navê hemû jinên li Bakur û Rojhilatê Sûriyeyê, ez silavên germ û hezkirina xwe ji bo hemû jinên ku beşdarî vê meşa bi rûmet dibin re dişînim. Jinên ku daxwaza azadiyê dikin, Rêber Apo li Tirkiyeyê pêvajoyek dîrokî da destpêkirin. Armanca wî ew e ku hemû pirsgirêkan bi awayekî aştiyane li ser navê gelan û jinan çareser bike.
Em bawer dikin ku ev ne tenê ji bo Bakur, lê ji bo tevahiya Rojhilata Navîn mifteya vejîneke nû ye. Ew ê pirsgirêkan di bingeha xwe de çareser bike. Ji bo ku ev pêvajo bi ser bikeve, divê pergala Îmraliyê were hilweşandin û Rêber Apo di şert û mercên azad de siyasetê bike. Ji ber vê yekê, em dengê xwe bi dengê we re dikin yek û dibêjin: dem dema azadiya Rêber Apo ye. Bi îradeya jinan, em dikarin hemû astengiyan ji holê rakin. Bijî têkoşîna hevpar a jinan. Bijî şoreşa me ya ‘Jin jiyan azadî’.”
