Meşa “Em bi hêviyê ber bi azadiyê ve dimeşin” a Tevgera Jinên Azad (TJA) gihîşt Enqereyê. 25 jinên ku 1’ê Cotmehê ji Amedê dest bi meşê kirin ji Riha, Dîlok, Edene û Mersînê derbas bûn û piştî ku gihîştin Enqereyê ber bi Girtîgeha Sîncanê ve meşiyan û daxuyaniyek dan çapemeniyê. Jin 6 rojan li her devera ku jê derbas bûn bi girseyî hatin pêşwazîkirin. Şêniyên Dîlok û Edeneyê yên meşvan pêşwazî kirin, anîn ziman ku wan ji jinan îlham wergirtine û banga xwedîderketina li pêvajoyê kirin. Jinan gotin, “Berpirsyariya me ya herî mezin avakirina aştiyê ye.”
‘JIN PÊŞENGIYÊ JI PÊVAJOYÊ RE DIKIN’
Nazmiye Vakif anî ziman ku divê gel piştgiriyê bidin hev, işaret bi rola pêşengiyê ya jinan a di pêvajoya aştiyê de kir û got, “Di vê demê de ji bo aştiyê divê gelên Kurd û Tirk ji bo paşeroja xwe piştgiriyê bidin hev. Tiştên ku bi serê me ve hatin bila neyên serê zarokên me. Jin pêşengiyê ji pêvajoya aştiyê re dikin. Îro Edene ji bêdengiyê rakirin, sibe dikarin her tiştî bikin.”
Vakif destnîşan kir ku jin di her gava pêvajoyê de hene û got, “Afirandina aştiyê di destê me de ye. Divê xwişk û biratî û yekîtî pêk were. Ji bo zarokên xwe divê em paşerojeke aştiyane ava bikin. Çi dibe bila bibe em ê daxwaza aştiyê bikin. Divê dewlet bi zimanê aştiyê biaxive, ne bi zimanê şer.”
‘VÊ ÇALAKIYÊ HÊZ DA ME’
Xebat Gencas di meşê de axivî, bal kişand ser binpêkirinên mafên mirovan ên li girtîgehan û banga jinûve destpêkirina pêvajoya aştiyê kir. Xebat Gencas got, “Girtî di bin êşkenceyê de ne, dayik beriya ku zarokên xwe bibînin jiyana xwe ji dest didin. Em aştiyê dixwazin, em pêvajoyeke baş dixwazin. Divê dewlet gavê biavêje. Divê dewlet guh bide daxwazên aştiyê. Aştîxwazan bi salan rehetî nedîtin. Hêrsa şer a dewletê bi kêrî kesî nayê. Divê her kes aştiyê bixwaze.”
‘EM DIXWAZIN HÊVIYÊ MEZIN BIKIN’
Dîdem Erener jî işaret bi girîngiya civakîbûna aştiyê kir. Erener anî ziman ku tecrûbeyên berê civak westaniye û got, “Divê aştî civakî bibe, ev yek ji bo rêveçûna pêvajoyê di nava aştiyê de gelekî gigrîng e. Di pêvajoyên berê de bûyerên neyînî qewimîn. Weke gel hem ji aliyê aborî hem jî ji aliyê civakî ve em gelekî westiyan. Her roj jin têne kuştin, xweza tê talankirin. Ji ber vê yekê civakîbûna aştiyê ji her demê bêhtir hêja ye.”
Erener destnîşan kir ku aştî ne tenê ji bo hin herêman, lê ji bo tevahiya gelên Tirkiyeyê pêwîstiyeke hevpar e û got, “Eger em karibin daxwaza aştiyê civakî bikin, hem ji aliyê aborî hem jî ji aliyê civakî ve civak wê rehet bibe. Her yek ji me divê li cihê ku lê ye vê daxwazê mezin bike. Heta ku gavên hiqûqî û demokratîk neyên avêtin, ev daxwaz wê bersivê nebîne û mirov bêhêvî bibin. Halbûkî em dixwazin hêviyê mezin bikin.”
