Partiya Yekitiya Demokratîk (PYD) têkildarî êrişên hêzên hikumeta demkî yên li ser taxên Şêxmeqsûd û Eşrefiyê de daxuyaniyek nivîskî weşand.
PYD’ê diyar kir ku gelê Sûriyeyê û cîhan li hêviya diyalog, tifaq û beşdariya hemûyan di avakirina Sûriyeyê nû de û bidawîkirina alozî û bêistiqrariyê ne, lê hikumeta demkî bêyî ku girîngiyê bide peymanên ku îmaze kirine, bi taybetî peymana 1’ê Nîsanê ya li gel Meclisa Sivîl a Taxên Şêxmeqsûd û Eşrefiyê, hewl dide demê qezenc bike û temenê pêvajoya demkî dirêj bike.
PYD’ê fikarên xwe ji ber nêzîkatiyên hikumeta demkî anî ziman û da zanîn ku ev nêzîkatî êşa welatiyan zêde dike û pêvajoya diyaloga nîştimanî asteng dike.
PYD’ê di dewama daxuyaniyê de diyar kir ku “tevgerên dawîn yên hin komên çekdar ên girêdayê Tirkiye yên di nava hikumeta demkî ya Sûriyeyê de yên li dijî taxên Şêxmeqsûd û Eşrefiyê, girtiyan rêyan, ambargo û êrişên li ser sivîlên banga rakirina ambargoyê dikin, di heman demê de êrişên li ser Dêr Hafir û Bendava Tişrînê beşek ji plana derxistina şerekî fireh li Sûriyeyê, wêrankirina jiyana û qetilkirina hejmareke zêdetir a Sûriyeyê ye, mîna bûyerên li Siwêda û peravê rû dane.”
PYD’ê destnîşan kir ku fitne gefan li ewlehiya tevahiyan dixwe û dê welat ber bi talukeyê ve bibe.
PYD’ê bi domdarî got “Em ji gelê xwe bawer in ku dê tevahî komployên li dijî yekitî û nasname û jiyana wê pûç bikin. Şêniyên Şêxmeqsûd û Eşrefiyê yên ku bi lehengî li dijî êrişên çeteyên DAIŞ, rejîma Baasê û çeteyên dewleta Tirk a dagirker şer kirine, dê li hemberî êrişan ne bi tenê bin.”
PYD’ê bang li tevahî pêkhateyên Sûriyeyê kir û got: “Bi aqilmendî û berpirsyarî tev bigerin, li hember planên fitne û şerê navxweyî bisekinin, neyên lîstok û gotinên nefret, nîjadperastî û mezhebperestiyê, hevgirtina civakî biparêzin. “Her wiha bang li raya giştî ya cîhanê û erebî kir ku bi rola xwe ya berpirsyar rabin, girîngiyê bidin rewşa Sûriyeyê, rê nedin ku welat ber bi şerekî navxweyî ve biçe û parastina sivîlan bikin.
PYD’ê di dewama daxuyaniyê de got: “Em bang li hêzên ku dixwazin bi rêya normalîzkirina têkiliyan bi Şamê istiqrarê mîsoger peyda bikin, dikin ku hemû kelemên li pêşiya diyalogên di navbera Rêveberiya Xweser û desthilata demkî de rakin, da ku rê li ber pêkanîna peymana 10’ê Adarê were vekirin. Li gel gef û êrişan diyalogên berhemdar nin in.”
Di daxuyaniyê de bang li hikumeta demkî hat kirin û hate gotin: “êrişan rawestîne, rê û deriyan veke, dawî li kiryar û gotinên neyninî yên ku lihevhatina navxweyî asteng dike, bîne, ne bi çek û gefan, lê bi diyalogan pirsgirêkan derbas bikin.”
Di dawiya daxuyaniyê de hate gotin, parastina sivîlan û yekitiya welat û rûmeta welatiyan divê armanca pêşîn a hemûyan be.
