Cenazeyê şervanê QSD’ê Têkoşer Efrîn (Îbrahîm Omer) yê ku 13’ê Çileya 2025’an di berxwedana li Bendava Tişrînê de şehîd bibû, bi merasîmekê li Pakrewangeha Şehîdan a li bajarokê Hikumiyê yê bakurê kantona Reqayê hat veşartin. Di merasîmê de şervanê QSD’ê Sîdar (Elî Mihemed Hemîd Derwîş) jî yê 16’ê Kanûna 2024’an li Bendava Tişrînê şehîd bibû, hat bibîranîn. Bi sedan şêniyên kantona Reqayê, endamên saziyên sivîl û meclisên leşkerî beşdarî merasîmê bûn.
Merasîm bi deqeyek rêzgirtin dest pê kir. Piştre şervanên QSD’ê torana leşkerî li dar xist.
Hevserokê Meclisa Malbatên Şehîdan a Kantona Reqayê Ehmed El Şêx di merasîmê de axivî. El Şêx sersaxî ji malbatên şehîdan re xwest û anî ziman ku dê şopadarên rêya şehîdan bin.
Ji fermandarên QSD’ê Rizgar Cûdî jî bal kişand ser berxwedana li Bendava Tişrînê hat raberkirin û got: “Şehîdan ji bo parastina xaka me ji êrîşên dewleta Tirk a dagirker de berdelên giran li Bendava Tişrînê dan. Em soz didin şehîdan ku em ê rêya berxwedan û têkoşîn bidomînin heta serkeftinê bi dest bixin. Em ê li ber xwe bidin. Em ê axa xwe biparêzin.”
Endamê Kombenda Efrîn a Civakî Mihemed Hikmet jî anî ziman ku şehadet serbilindahî ye û şehîdên wan efsanên lehengî û fedaîyetiyê nîvisandin.
Piştî nasnameyên her du şehîdan hatin xwendin, cenazeyê şehîd Têkoşer Efrîn bi dirûşmên “Bi can, bi xwîn em bi te re şehîd” hat veşartin.
