Federasyona Gaziyên Bakur û Rojhilatê Sûriyeyê ji ber salvegera 27’an a Komploya Navneteweyî ya 9’ê Cotmehê daxuyaniyek da.
Di destpêka daxuyaniyê de hate gotin, “Di serî de em Komploya Navneteweyî ya 9’ê Cotmeha 1998’an a di şexsê Rêber Apo de li hember hemû gelên azadîxwaz hat kirin bi hêrseke mezin rûreş û şermezar dikin. Em Rêbertiya xwe ya ev 27 sal zêdetir e di nav berxwedaneke bêhempa de rêya diçe jiyaneke azad vekir û ew komploya bêbext bi îradeyeke bêhempa têk bir, bi rêz û hurmet silav dikin.”
Daxuyaniyê bi vî rengî dewam kir:
“Hêzên hegemon û serwer ên dixwestin di destpêka sedsala 21. de careke din mudaxeleyî Rojhilata Navîn bikin û ji nû ve li gor berjewendiyên xwe dîzayn bikin Rêber Apo û Tevgera Azadiyê li hember xwe weke astengiya herî mezin dîtin.
Li ser vî bingehî komplo û planeke heya îro nehatiye dîtin li hember Rêberê Gelan Abdullah Ocalan meşandin. Di encama wê komploya wê timî weke deqeke reş li ser eniya zilmkaran be, Rêbertiya me 15’ê Sibata 1999’an radestî dewleta Tirk a dagirker hat kirin.
Rêbertiya me li hember her cure planên teslîmgirtin, tesfiye, tecrîd û îzolasyonan berxwedaneke mezin pêş xist. Bi têkoşîneke bêmînak heqîqeteke ku bi temamî ji bo mirovatî û jiyana azad e derxist holê. Li hemberî pergalên xwînmij, civaka exlaqî û polîtîk, paradîgmaya ekolojîk, demokratîk û azadîxwaziya jinê pêşkeşî mirovatiya pêşverû kir.
Di vê pêvajoya ku em tê de ne êdî deriyê azadiyê heta dawiyê di serî de gelê Kurd ji bo hemû gelan vebûye. Ya herî girîng ew e em bi coş û biryardariyeke mezin tevlî vê pêvajoya Aştî û Civaka Demokratîk a di pêşengiya Rêbertiya me de dimeşe de bibin.
Weke gaziyên şer bi vê wesîleyê em soz didin tevahî şehîdên azadiyê em ê destketiyên xwe biparêzin, Rêberê xwe azad bikin, hesab ji komplogeran bipirsin û di welatekî azad de pêşengiyê ji bo tevayî gelên herêm û cîhanê bikin.”
