Navenda Ragihandin û Çapemeniya Yekîneyên Parastina Rojhilatê Kurdistanê (YRK) têkildarî şehadeta şervanê xwe daxuyaniyek nivîskî da.
YRK’ê got, “23’yê Îlona 2025’an şervanê wan ê bi navê Azad Zagros ji ber rewşa tenduristî dema li ser rêya Merîwanê vedigere Başûrê Kurdistanê li gel keseke ku heta niha navê wî nehatiye zelalkirin, di nava bajar de ji aliyê dezgeha Îstixbaratî ya Îranê û Parêzvanên Şoreşê ve li taxa Mûsk gule li wesayîtan wan tê reşandin û tên qetilkirin.”
YRK’ê anî ziman ku şervanê wan Mihemed Husên Reşîd (Azad Zagros) xelkê Silêmanî yê Başûrê Kurdistanê ye û çend sal bûn li bajarê Merîwanê kar dikir û got: “Demek bû pirsgirêkên wî yên tenduristî hebû û ji bo tedawiyê vedigeriya Başûrê Kurdistanê.”
YRK’ê da xuyakirin ku dewleta Îranê li ser bûyerê ti daxuyaniyek nedaye û rewşê veşartiye û got: “Ev cûre qetilkirine, komkujî û sûcê şere. Ev komployeke bê exlaqî ye.”
Yekîneyên Parastina Rojhilatê Kurdistanê (YRK) sersaxî ji malbata şehîd Azad Zagros, eşîra Berzencî, hemû gel û welatparêzên Başûrê Kurdistanê û tevahî Kurdistanê re xwest û got: “Em soz û girêdana xwe ya bi Şehîd Azad Zagros re dubare dikin. Heta azadiya Kurdistanê, pêkanîna aştî û civaka demokratîk, her wiha bi cihanîna xeyalên hemû şehîdan em ê têkoşîna xwe dewam bikin.”
Nasnameya şehîd wiha ye:
Nasnav: Azad Zagros
Nav û Paşnav: Mihemed Husên Reşîd
Navê Dayîk-Bav: Gelawêj Heme Ferec-Husên Reşîd
Cih û Dîroka Jidayîkbûnê: 1996-Cemçemal
Cih û Dîroka Şehadetê: Merîwan/23’ê Îlona 2025
