Berdevka Navenda Jineolojiyê ya Kantona Firatê Sedîqa Xilo têkildarî 8’ê Adarê Roja Jinên Kedkar ên Cîhanê ji ANF`ê re axivî.
Sedîqa Xilo anî ziman ku 8’ê Adarê ji bo jinan rojeke nû ye Û got, “Beriya şoreşa jinê destpê bike, ango şoreşa Rojava, di nava civakê de her jin weke amûreke malê dihat dîtin. Jinê nizanîbû ku roja 8’ê Adarê roja jinê ye û jinan li hemberî desthilatdariyê serî hildaye. Lê piştî şoreşa 19’ê Tîrmehê, hemû roj bûn roja jin û tê de jinê her rojê cejna xwe pîroz dikir û di hemû waran de jin bû pêşeng. Jinê ewil li hemberî desthilatdariyê serî hilda û li dijî zihniyeta mêrserwer serî hilda.”
Sedîqa Xilo diyar kir ku wan weke Navenda Jineolojiyê di çarçoveya 8`ê Adarê de gelek semîner û çalakiyên cur bi cur li dar xistine û got, “8’ê Adarê dema ku tê gotin, têkoşîna jinê tê bîra mirov. 8`ê Adarê rojeke pir bi êş e, tê de 129 jin di kargehê de hatin şewitandin. Jinê ji bo wekheviyê serî hilda. Ji bo wê jî li wê kargehê ji aliyê rêveberiya kargehê bi qasî 129 jin hatin şewitandin û jiyana xwe ji dest dan, li wir tevahî jin rabûn ser piyan û serî hildan.”
‘BI BERXWEDAN Û ISRARA JINÊ YA TÊKOŞÎNÊ DAÎŞ TÊK ÇÛ’
Sedîqa Xilo di dewama axaftina xwe de got, bi destê jinê xetertirîn terora li ser rûyê erdê hat tunekirin û got: “Di berxwedana Kobanê de, êrîşa çeteyên DAÎŞ bi destê jinê hate şikestin. Di 26`ê Çileyê de Kobanê bû destpêka têkçûna DAÎŞ’ê. Ew jî bi saya berxwedana jinê bû. Hemû rojên ku bi berxwedanê tijî bûye, ew jî bi saya jinê û şoreşê ye.”
‘BI DESTÊ JINÊ DAGIRKERÎ TÊK ÇÛYE’
Sedîqa Xilo ragihand ku berxwedana ku niha li Pira Qereqozax û Bendava Tişrînê bi pêşengtiya YPJ’ê dibe, nayê pênasekirin û got, “Îro dîsa jinê xwe da isbatkirin ku dikare li hemberî her hêzê şer bike. Ewil hêza zilam a serwer, dûre jî li hemberî destdirêjiya li ser axa wê. Mînaka herî ber biçav ku niha bi pêşengtiya YPJ’ê berxwedaneke dîrokî li Bendavê û Pira Qereqozaxê diqewime. Li hemberî dagirkeriyê bi destê jin berxwedaniyek û destaneke tê kirin. Îro ne tenê jin bûye pêşeng, ew bi xwe siyasetmedar e, fermandar û rêveberiya civakê ye. Êdî jin gihiştiye wê astê ku civak bi giştî birêxistin kiriye.”
Sedîqa Xilo di dawiya axaftina xwe de 8’ê Adarê li Rêber Apo û hemû jinan pîroz kir.
