Konfederasyona Sendîkayên Kedkarên Cemaweriyê (KESK) ji bo radestkirina wezîfeya kedkarên cemaweriyê yên bi biryarnameyan ji kar hatine dûrxistin û jinûve avakirina mafên demokratîk meşek dan destpêkirin. Meşa ku 13’ê Cotmehê ji Amedê destpê kir, di 17’ê Cotmehê de wê li ber Meclîsê bi dawî bibe. Baskê meşê ji Amed, Riha, Edene, Mersîn, Dîlok û Semsûrê bi rê ketin. Herî dawî jî li Semsûrê KESK’ê daxuyaniyek da û meşa xwe dewam dike.
JI SALA 2016’AN Û PÊ VE DEMOKRASÎ HATE BETALKIRIN
Hevseroka KESK’ê Ayfer Koçak qala hincet û armancên meşê kir û got, “Beriya biryarnameyên di hukmê qanûnê de (KHK) li welêt têkildarî demokrasiyê pirsgirêk hebûn. Em ti carî ne li welatekî xwedî standartên demokrasiyê bûn. Lê belê bi sala 2016’an re demokrasî bi temamî hate betalkirin, em ketin nava pêvajoyeke welê ku pêvajoyên hiqûqî bi cih nehatin anîn. Ev pêvajoya ku bi KHK’an destpê kir, li bajarên Kurdan bi polîtîkayên qeyûm ên li hemberî şaredariyên HDP’ê girantir bû. Girtina hilbijartiyan, ragirtina girtiyên siyasî, tinehesibandina îradeya hilbijartinê dewam dike.”
Li gorî Ayfer Koçak bi KHK’an ne tenê xebatkar ji wezîfeya xwe hatin dûrxfistin, bi lêpirsîna ewlekarî û mulakatê ya têkildarî ketina qada cemaweriyê polîtîkaya dervehiştinê kete meriyetê.
Ayfer Koçak işaret bi zextên li qada azadiya çapemeniyê kir û bi bîr xist ku mafên televîzyonên hatin girtin, rojname û kovaran hîn nehatine radestkirin.
Ayfer Koçak ragihand ku newekheviya aboriyê hîn giran bû û neheqiya di hatineyê de kedkar ber bi xizaniyê ve dehf daye.
Ayfer Koçak got, “Wê demê 4 hezar û 800 endamên me ji kar hatin dûrxistin. Mesele ne tenê ev e. Piştî KHK’an zarok û ciwanên muxalîfan şensê xwe yê cihgirtina li karên cemaweriyê ji dest dan.” Ayfer Koçak diyar kir ku nêzî nîvê hevalên wan ên teqawît jî mehkûmî sînorê birçîbûnê hatine kirin, piraniya xebatkaran jî hewl didin jiyana xwe bi mûçeyê kêmtirîn îdare bikin.
ALIYEKÎ DIN Ê MEŞÊ JÎ DAXWAZA AŞTIYÊ YE
Ayfer Koçak her wiha anî ziman ku beriya 10 salan bi bidawîbûna pêvajoya aştiyê re şerekî giran destpê kir, vê yekê bandoreke mezin li kedkaran kir û got, meşa KESK’ê ne tenê têkildarî binpêkirinên mafên mirovan ên berê ne, her wiha xwe dispêre vîzyona aştî û demokrasiyê ya paşerojê. Ayfer Koçak got, “Aştiya rastî bi xwedîderketina gelan a li pêvajoyê, bi qebûlkirina azadiyê û xurtkirina demokrasiyê dibe. Em bi vê meşê ne tenê daxwaza radestkirina wezîfeya hevalên xwe yên KHK’î dikin, di heman demê de daxwaza jinûve avakirina demokrasiyê li vî welatî dikin. Em dibêjin ku divê aştî di navenda gelan de ava bibe. Ji ber ku li cihê ku gel nebe, şer ji holê ranebe hingî qadeke din a şer her tim ava dibe.”
