Hate ragihandin ku şer şeva Sêşemê li herêma Spin Boldak a Efganistanê qewimî. Berdevkê Daîreya Ragihandinê Ali Mohammad Haqmal anî ziman ku êrîş bi topên hewanê hatiye kirin û di encamê de 15 sivîlan jiyana xwe ji dest dan.
Rayedarekî ji nexweşxaneya Spin Boldakê Abdul Jan Barak jî daxuyanî da AFP’ê û diyar kir ku di nava zêdeyî 80 birîndaran de gelek jin û zarok hene.
Berdevkê hikumeta Talîbanê Zabihullah Mucahid jî hêzên Pakistanê sûcdar kir ku “Careke din êrîş birin ser xaka Efgan.”
Mucahid anî ziman ku li navçeya Spin Boldakê di êrîşên bi çekên giran û sivik de 12 sivîlan jiyana xwe ji dest dan, 100 kes jî birîndar bûn.
Mucahid diyar kir ku piştî şer hin leşkerên Pakistanê hatin kuştin, çekên wan hatin bidestxistin û li herêmê niha aramiyek heye. Li gorî nûçegihanê AFP’ê hemû kargeh girtî ne û gelek sivîl ji herêmê çûne.
Rayedarên Pakistanê hîn daxuyaniyeke fermî nedane. Lê belê çavkaniyên ewlekariyê ragihandin ku ji herêma Kurramê ya li bakurê welêt êriş li ser çeperên Efgan hate kirin.
Rageşiya ku dema dawî di navbera herdu welatan de zêde bû, bi sûcdarkirina hev hîn mezin bûye. Rêveberiya Islamabadê Efganistanê sûcdar dike ku di serî de Talîban a Pakistanê (TTP) gelek komên çekdar ên cuda vedihewîne.
