Şefê Pentagonê Pete Hegseth da zanîn ku êrîş roja Înê li Behra Karayîpê hatiye kirin û sê kesan jiyana xwe ji dest dane.
Hate ragihandin ku êrîş beşeke operasyonên leşkerî yên Wahingtonê yên li peravên Venezuelayê yên ji meha Tebaxê ve ye.
Artêşa Dewletên Yekbûyî yên Emerîkayê (DYE) li gel vê êrîşa dawîn herî kêm heft keştî hedef girtine û zêdetirî 30 kes kuştine. Lê belê li gorî pisporan ev êrîşên ku bêyî lêpirsîn û sekinandin tên kirin ne qanûnî ne.
TRUMP, PETRO BI ‘BARNTIYA TIRYAKÊ’ SÛCDAR KIR
Serokê DYE’yê Donald Trump, li ser medyaya dijîtal Truth Socialê Serokdewletê Kolombiyayê Petro Gustavo Petro bi gotinên tund hedef girt.
Trump îdîa kir ku Petro ‘’hilberîna tiryakê teşwîq dike’’ û Petro weke baronekî ku li welatê xwe piştgiriyeke zêde dide hilberîna tiryakê sûcdar kir.
Trump, di daxuyaniya xwe de diyar kir ku DYE wê alîkariyên malî ên ji Kolombiyayê re bide sekinandin lê belê diyar nekir ku wê kîjan fon werin sekinandin.
PETRO: PIRSGIRÊK NE DYE YE, TRUMP E
Serokdewletê Kolombiyayê Petro Gustavo Petro, li ser medyaya dijîtal X’ê bersiv da daxuyaniya Trump. Petro anî ziman ku şêwirmendên Trump wî şaş agahdar dikin û got: ‘’Ez li hemberî dîrok, gel û çanda DYE’yê rêzê digirim (…) Pirsgirêk ne DYE ye, Trump e.’’
RAGEŞIYA DÎROKÎ
Li gorî daneyên DYE’yê Kolombiyayê di sala 2023’yan de zêdetirî 740 milyon dolar alîkarî standiye; niviya vî pereyî ji bo têkoşîna li dijî tiryakê û niviya din jî ji bo bernameyên xwarin û mirovî hatibû veqetandin. Lê belê DYE’yê di meha Îlonê de Bogota ji listeya 20 hevalbendên ‘’antî-narko’’ derxistibû. Sedema derxistinê jî weke ‘’hilberîna kokaînê ya gelekî zêde’’ û ‘’hewldanên muzakereyê yên neserkeftî’’ hatin nîşandan.
Li gorî daneyên Neteweyên Yekbûyî (NY) Kolombiyayê di sala 2023’yan de 2.600 ton kokaîn hilberandiye û li seranserê cîhanê bûye mezintirîn welatê ku hilberîna kokaînê dike. Ev yek nîşan dide ku li gorî salên borî hilberîna tiryakê ji sedî 53 zêde bûye. Petro jî vê yekê weke ‘’xetayên metodolojîk’’ pênase dike û red dike.
PETRO: DYE SERWERIYA ME BINPÊ DIKE
Hikûmeta Petro, diyar dike ku operasyonên leşkerî yên DYE’yê yên li Behra Karayîpê serweriya behrê ya Kolombiyayê binpê dike. Petro anî ziman ku di encama êrîşên hêzên DYE’ye de masîgirekî jiyana xwe ji dest daye.
Alîkarê Serokê DYE’yê JD Vance jî bersiv da van îdîayan û got: ‘’Aqûbeta kesên sax ne xema min e; bila bes jehrê derbasî welatê me nekin.’’
